ផ្លូវក្រវាត់ក្រុងមានសារៈសំខាន់បែបណា ចំពោះសេដ្ឋកិច្ចកម្ពុជា?

2018-03-26 04:26:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការស្ថាបនាផ្លូវក្រវ៉ាត់ក្រុង ក្នុងគោលដៅមិនត្រឹមតែអាចបញ្ចៀសការកកស្ទះចរាចរណ៍កណ្តាលក្រុងប៉ុណ្ណោះទេ ប៉ុន្តែថែមទាំងជួយជំរុញសន្ទុះនៃចរន្តកំណើនសេដ្ឋកិច្ច តាមរយៈភាពងាយស្រួលក្នុងការដឹកជញ្ជូន និងការបង្កើនសក្តានុពលវិនិយោគនៅតាមតំបន់ជាយក្រុងផងដែរ។

អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ីមសូរិយា បានថ្លែងប្រាប់ខ្លីៗឲ្យដឹងថា ការសាងសង់ផ្លូវក្រវ៉ាត់ក្រុង គឹដើម្បីតភ្ជាប់ពីច្រករបៀង១ ទៅកាន់ច្រករបៀង១ផ្សេងទៀត ពោលគឺដើម្បីតភ្ជាប់ទៅកាន់ផ្លូវជាតិសំខាន់ៗដូចជាផ្លូវជាតិលេខ ១,២,៣,៤ និងផ្លូវជាតិលេខ៥។

លោក ងួន ឆាយលាង អគ្គនាយកក្រុមហ៊ុនអចលនទ្រព្យ Pointer បានថ្លែងប្រាប់ខ្លីៗឲ្យដឹងដែរថា ការសាងសង់ផ្លូវក្រវ៉ាត់ក្រុង បានរួមចំណែកការអភិវឌ្ឍតំបន់ជាយក្រុង ដែលជំរុញឲ្យមានការវិនិយោគលើវិស័យលំនៅឋានដូចជាបុរី និងផ្ទះល្វែងជាដើម។

បើតាមការលើកឡើងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ ផ្លូវក្រវ៉ាត់ក្រុង នឹងចូលរួមកាត់បន្ថយការកកស្ទះ និងគ្រោះថ្នាក់ចរាចរណ៍ ជំរុញការដឹកជញ្ជូន ភស្តុភារ និងទំនិញ មានលក្ខណៈកាន់តែងាយស្រួលពីផ្លូវជាតិលេខ៥ ទៅផ្លូវជាតិលេខ២ និងទៅផ្លូវជាតិលេខ១ បានឆាប់រហ័ស ជាពិសេសការតភ្ជាប់ទៅកាន់តំបន់ទំនប់កប់ស្រូវ។

លោកបញ្ជាក់ថា តំបន់ទំនប់កប់ស្រូវ កំពុងមានការអភិវឌ្ឍខ្លាំង និងប្រែក្លាយទៅជាមជ្ឈមណ្ឌលស្តុកផ្គត់ផ្គង់ និងចែកចាយទំនិញ នៅតំបន់ភាគខាងលិចរាជធានីភ្នំពេញ តភ្ជាប់ទៅកំពង់ផែស្វយ័តភ្នំពេញ (ផ្លូវជាតិលេខ១) និងទៅក្រុងហូជីមិញប្រទេសវៀតណាមផងដែរ។

សូមជម្រាបថា គិតមកទល់នឹងបច្ចុប្បន្ននេះ ផ្លូវក្រវ៉ាត់ក្រុងខ្សែទី២ បាននឹងកំពុងសាងសង់ដោយបានចែកចេញជា២កំណាត់។ កំណាត់ទី១ មានប្រវែង១០គីឡូម៉ែត្រ ដោយតភ្ជាប់ពីផ្លូវទំនប់កប់ស្រូវ(ឬផ្លូវ១២០K) ឆ្ពោះទៅកាន់មហាវិថីសហព័ន្ធរុស្សីចំណាយ ១០លានដុល្លារ ត្រូវបានដាក់ឲ្យប្រើប្រាស់នៅខែមីនា ឆ្នាំ២០១៧។ ចំណែកឯ កំណាត់ទី២ តភ្ជាប់ពីមហាវិថីសហព័ន្ធរុស្សី (ត្រង់ស្តុបផ្សារដីហុយ) ឆ្ពោះទៅផ្លូវជាតិលេខ២ (ត្រង់ស្ពានព្រែកសំរោង តាខ្មៅ) ចំណាយ៦២លានដុល្លារ ដោយគ្រោងនឹងបញ្ចប់នៅឆ្នាំ២០១៩។ ចំណែកគម្រោងសាងសង់ផ្លូវក្រវ៉ាត់ក្រុងខ្សែទី៣ គ្រោងនឹងចាប់ផ្តើមសាងសង់ក្នុងឆ្នាំនេះ៕

អត្ថបទ៖ ឈុត សិរីឧត្តម