លោក កឹម សុខា ស្នើឲ្យអ្នកនយោបាយខ្មែរដោះស្រាយបញ្ហាដោយអហិង្សា

2018-04-12 09:57:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក កឹម សុខា អតីតប្រធានអតីតគណបក្សសង្គ្រោះជាតិ បានអំពាវនាវដល់អ្នកនយោបាយខ្មែរ និងអ្នកដឹកនាំប្រទេស ដោះស្រាយបញ្ហាដោយអហិង្សា និងកុំយកខ្មែរគ្នាឯងជាសត្រូវ។ នេះបើតាមខ្លឹមសារ១នៅក្នុងសារលិខិតរបស់លោក កឹម សុខា ដែលបានផ្ញើពីពន្ធនាគារត្រពាំងផ្លុង ខេត្តត្បូងឃ្មុំ នៅថ្ងៃទី១២ ខែមេសា ឆ្នាំ២០១៨នេះ ក្នុងឱកាសបុណ្យចូលឆ្នាំខ្មែរ។

លោក កឹម សុខា ថ្លែងនៅមុខសាលាដំបូងរាជធានីភ្នំពេញ កាលពីឆ្នាំ២០១៧ មុនពេលជាប់ពន្ធនាគារ

លោកបានលើកឡើងក្នុងសារលិខិតនោះថា សេចក្តីសុខ និងសន្តិភាពពិតប្រាកដអាចកើតមានឡើង លុះត្រាតែម្ចាស់ស្រុកទាំងអស់គ្នា អាចរស់នៅបានដោយមានយុត្តិធម៌ និងគ្មានការភ័យខ្លាច។ លោកបន្តថា មានតែព្រហ្មវិហារធម៌ប៉ុណ្ណោះ ដែលអាចឲ្យអ្នកដឹកនាំម្នាក់ យកឈ្នះលើទឹកចិត្តប្រជាពលរដ្ឋរាប់លាននាក់ និងរក្សាក្តីស្រឡាញ់គោរពជានិរន្ត មិនថានៅក្នុងកាលៈទេសៈណាក៏ដោយ។

នៅចុងបញ្ចប់នៃសារលិខិតនេះ លោក កឹម សុខា បានសរសេរយ៉ាងដូច្នេះថា៖ «ខ្ញុំព្រះករុណា ខ្ញុំសូមបួងសួង និងឧទ្ទិសដល់បារមីវត្ថុស័ក្តិសិទ្ធិ សូមទេវតាឆ្នាំថ្មី សូមឲ្យខ្មែរទាំងអស់គ្នារស់នៅដោយការយោគយល់គ្នា ដោយសាមគ្គីធម៌ ដោយក្តីមេត្តា និងដោយការរីកចម្រើនគ្រប់ៗគ្នាជាដរាបរៀងទៅ»៕

អត្ថបទ៖ សំភី