ស្ថានទូតអាម៉េរិកនៅកម្ពុជា ដេញបុគ្គលិកខ្មែរ-អាម៉េរិក័ង ៣២នាក់ចោល

2018-04-13 15:18:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថានទូតអាម៉េរិកនៅរាជធានីភ្នំពេញ បានបណ្តេញបុគ្គលិករបស់ខ្លួន៣២នាក់ចេញពីការងារ បន្ទាប់ពីពួកគេត្រូវបានចោទប្រកាន់ថា បានចែកចាយរូបភាពអាសអាភាសនៅក្នុង Group Chat មិនផ្លូវការមួយ។ នេះបើតាមការឱ្យដឹងពីប្រភពដែលស្និទ្ធនឹងស្ថានទូត នៅថ្ងៃសុក្រទី ១៣ មេសា នេះ។

ប្រភពព័ត៌មានចំនួន៤នាក់ បានរាយការណ៍ប្រាប់ទីភ្នាក់ងារសារព័ត៌មានរ៉យទ័រ ( Reuters) ថា រូបភាព និង វីឌីអូ អាសអាភាស ដែលមានទាំងរូបភាព របស់កុមារអាយុក្រោម ១៨ឆ្នាំ ផងនោះ ត្រូវបានគេចែកចាយនៅក្នុង Group Chat ហ្វេសប៊ុក។ បន្ទាប់មកភរិយាអ្នកធ្វើការក្នុងស្ថានទូត បានឃើញរូបភាពនោះ ហើយបានរាយការណ៍ទៅមន្ត្រីស្ថានទូត។ ប្រភពបន្តទៀតថា បញ្ហានេះត្រូវបាន បញ្ជូនទៅការិយាល័យស៊ើបអង្កេត FBI ។

មន្ត្រីស្ថានទូត ដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ទីភ្នាក់ងារសារព័ត៌មានរ៉យទ័រ ( Reuters) ថា បុគ្គលិកទាំងនោះ ត្រូវបានដកហូតប័ណ្ណសម្គាល់ខ្លួន និង ឆែកទូរសព្ទដៃ។ ប្រភពបន្តទៀតថា បុគ្គលិកទាំង ៣២នាក់នោះ មានជនជាតិខ្មែរ និង ជនជាតិអាម៉េរិក័ងដើមកំណើតខ្មែរ ហើយពួកគេភាគច្រើនជាសន្តិសុខ និងស្មៀន។ ក្នុងចំណោមពួកគេ មិនមានអ្នកការទូតទេ។

ប្រភព២នាក់ ដែលជាអ្នកធ្វើការក្នុងស្ថានទូត បានបញ្ជាក់ថា ពិតជាមានការបណ្តេញបុគ្គលិកចេញមែន។

ជុំវិញបញ្ហានេះ កាសែតភ្នំពេញប៉ុស្តិ៍ នៅល្ងាចថ្ងៃសុក្រនេះ បានស្រង់សំណេរតាមអ៊ីមេលរបស់ អ្នកនាំពាក្យស្ថានទូតអាម៉េរិក លោក David Josar ថា ស្ថានទូតអាម៉េរិក មិនអាចធ្វើអត្ថាធិប្បាយចំពោះបញ្ហាបុគ្គលផ្ទៃក្នុងបានទេ។ អ្នកនាំពាក្យរូបនេះសរសេរថា ស្ថានទូតមានគោលការណ៍រឹងមាំ និង ច្បាស់លាស់ចំពោះការប្រព្រឹត្តិសមរម្យរបស់បុគ្គលិក និង មាននីតិវិធីប្តឹងទាស់សម្រាប់បុគ្គលិក ប្រសិនបើពួកគេត្រូវបានបញ្ឈប់ពីការងារដោយមិនត្រឹមត្រូវ៕

ប្រភព៖ Reuters ប្រែសម្រួល៖ ឃុត សុខឿន