សម្តេច ស ខេង ឲ្យប្រជាពលរដ្ឋរាយការណ៍ពីភាពអសកម្មរបស់អាជ្ញាធរមូលដ្ឋាន

2018-04-22 01:46:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវឲ្យប្រជាពលរដ្ឋទាំងអស់ រាយការណ៍ពីភាពអសកម្មរបស់អាជ្ញាធរមានសមត្ថកិច្ចនៅថ្នាក់មូលដ្ឋាន ទៅថ្នាក់ជាតិ តាមរយៈបណ្ដាញសង្គម ឬតាមប្រព័ន្ធផ្សព្វផ្សាយនានា ដើម្បីជួយដោះស្រាយឲ្យបានទាន់ពេលវេលា។ ការថ្លែងនេះ បានធ្វើឡើងក្នុងពិធីសម្ពោធឆ្លងសមិទ្ធផលនានា នៅវត្តទួលពង្រ ស្ថិតនៅភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង កាលពីព្រឹកថ្ងៃទី២១ ខែមេសា ឆ្នាំ២០១៨។

សម្តេច ស ខេង ថ្លែងនាពេលកន្លងមក

សម្តេច ស ខេង បានមានប្រសាសន៍ថ្លែងទៅកាន់ប្រជាពលរដ្ឋយ៉ាងដូច្នេះថា «**បើមានអីខុសឆ្គង សុំមេត្តាបងប្អូនប្រជាពលរដ្ឋផ្តល់ព័ត៌មានឲ្យយើងខ្ញុំ តាមហ្វេសប៊ុក តាមទូរសព្ទ តាម WhatsApp telegram តាមវិទ្យុ ទូរទស្សន៍...កុំលាក់កុំលៀម ឃើញខុសថាខុស ដើម្បីសម្រួលកុំឲ្យមានបញ្ហាអ៊ីចឹងទៀត**»។

រដ្ឋមន្រ្តីមហាផ្ទៃរូបនេះ ក៏បានណែនាំដល់អាជ្ញាធរមូលដ្ឋាន កុំឲ្យបែងចែករឿងគណបក្សនិងនិន្នាការនយោបាយ ដោយក្នុងឋានៈជាអាជ្ញាធរ គឺគ្មានសិទ្ធិបែងចែកថា អ្នកនេះស អ្នកនោះខ្មៅ អ្នកនេះខៀវ អ្នកនេះក្រហម នោះទេ។

ជាមួយគ្នានេះ សម្តេចក្រឡាហោម ក៏បានស្នើឲ្យអាជ្ញាធរនៅមូលដ្ឋាន និងអ្នកដឹកនាំប្រកាន់ឥរិយាបទសុភាពរាបសារ គោរពប្រជាពលរដ្ឋ និងបម្រើប្រជាពលរដ្ឋ៕

អត្ថបទ៖ សោភា