ដឹងពីវត្ថុអនុស្សាវរីយដែល Sir Alex ជូន Wenger មុនការប្រកួតយប់មិញ

2018-04-30 01:44:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គ្រូតារបស់ក្លឹប Manchester United លោក Sir Alex Ferguson បានជូនវត្ថុអនុស្សាវរីយមួយ ដល់អ្នកចាត់ការក្លឹប Arsenal លោក Arsene Wenger នៅពេលដែលលោកត្រូវដឹកនាំ Arsenal ប្រកួតទល់នឹង Manchester United ជាលើកចុងក្រោយ នៅកីឡដ្ឋាន Old Trafford កាលពីយប់មិញ។

បើតាមសារព័ត៌មាន Daily Mail បានចុះផ្សាយថា លោក Sir Alex បានប្រគល់វត្ថុអនុស្សាវរីយជា ថូ មួយ ដល់លោក Wenger ដែលបានដឹកនាំ Arsenal អស់រយៈពេល ២២ឆ្នាំ។

លោក Jose Mourinho និង Sir Alex ស្វាគមន៍លោក Arsene Wenger នៅកីឡដ្ឋាន Old Trafford (រូបថត៖ Daily Mail)

ចាប់តាំងពីជំនាន់របស់លោក Sir Alex មក Man Utd និង Arsenal មានប្រវត្តិជួបគ្នាជាច្រើន ហើយការប្រកួតយប់មិញ គឺជាលើកទី២៨ នៃការដឹកនាំរបស់ Wenger មកកាន់ទឹកដី Old Trafford ។ អ្នកចាត់ការវ័យ ៦៨ឆ្នាំរបស់ក្រុមមកពីក្រុងឡុងដ៍ដដែល ក៏ទទួលបានការទះដៃអបអរសាទរពីអ្នកគាំទ្រក្រុមបិសាចក្រហម ពេលដើរចូលក្នុងទីលានផងដែរ។

សូមរំឭកថា អ្នកចាត់ការសញ្ជាតិបារាំងរបស់ Arsenal បានប្រកាសពីការចែកផ្លូវពីក្លឹប កាលពីដើមខែមេសាកន្លងទៅ។ លោកជាអ្នកចាត់ការតែម្នាក់គត់ ដែលដឹកនាំក្លឹបនៅក្របខ័ណ្ឌ English Premier League យូរជាងគេ។

យប់មិញ Manchester United បានយកឈ្នះ Arsenal ដោយលទ្ធផល ២-១។ Man Utd ស៊ុតបញ្ចូលទីដោយ Pogba និង Fellaini។ ចំណែក Arsenal ស៊ុតដោយ Henrikh Mkhitaryan ៕