ជប៉ុន នឹងជួយធ្វើឱ្យភ្នំពេញ ក្លាយទៅជាទីក្រុងឆ្លាតវៃ
- 2018-05-01 09:25:10
- ចំនួនមតិ 0 | ចំនួនចែករំលែក 0
ជប៉ុន នឹងជួយធ្វើឱ្យភ្នំពេញ ក្លាយទៅជាទីក្រុងឆ្លាតវៃ
ចន្លោះមិនឃើញ
លោក Yoshihisa Kainuma នាយកប្រតិបត្តិក្រុមហ៊ុនជប៉ុន Minebea (Cambodia) បានបញ្ជាក់អំពីការពេញចិត្តក្នុងការរួមចំណែកធ្វើឲ្យរាជធានីភ្នំពេញ ក៏ដូចជាទីក្រុងផ្សេងៗនៅប្រទេសកម្ពុជា ក្លាយទៅជា ទីក្រុងឆ្លាតវៃ (Smart City) ដែលមានគោលដៅធ្វើឱ្យអគ្គិសនីមានតម្លៃទាប។ លោកនិយាយដូច្នេះ ទៅកាន់សម្តេចនាយករដ្ឋមន្រ្តី ហ៊ុន សែន ក្នុងជំនួបពិភាក្សា១ នៅក្រុមហ៊ុន Minebea ក្នុងតំបន់សេដ្ឋកិច្ចពិសេសភ្នំពេញ នាព្រឹកថ្ងៃទី១ ខែឧសភា ឆ្នាំ២០១៨។
ជាការឆ្លើយតប សម្តេច ហ៊ុន សែន បានកោតសរសើរចំពោះការខិតខំរបស់ក្រុមហ៊ុនក្នុងការជួយក្នុងវិស័យអគ្គិសនី ជាពិសេសការអភិវឌ្ឍនូវក្រុងឆ្លាតវៃ។
គួររំលឹកថា អំឡុងកិច្ចប្រជុំកំពូលអាស៊ានលើកទី៣២ នៅប្រទេសសិង្ហបុរីកាលពីចុងសប្តាហ៍កន្លងទៅ មេដឹកនាំនៃបណ្ដាប្រទេសអាស៊ានទាំង១០ បានធ្វើការស្នើជ្រើសរើសទីក្រុងចំនួន ២៦ នៅក្នុងប្រទេសអាស៊ានទាំង១០ ធ្វើជាទីក្រុងសាកល្បងនៃគម្រោងបណ្ដាញក្រុងឆ្លាតវៃអាស៊ាន (ASCN)។ ក្នុងនោះ មានទីក្រុងរបស់កម្ពុជាចំនួន៣ផងដែរ គឺ រាជធានីភ្នំពេញ ក្រុងបាត់ដំបង និងក្រុងសៀមរាប។
មកទល់ពេលនេះ ក្រុមហ៊ុន Minebea (Cambodia) បានវិនិយោគនៅកម្ពុជា លើទឹកប្រាក់ប្រមាណ ១៤០លានដុល្លារ ហើយបើបូកទាំងការចំណាយទៅលើការដឹកជញ្ជូនផ្សេងៗទៀត គឺសរុបទាំងអស់ប្រមាណជា ១៧០លានដុល្លាររួចហើយ៕
អត្ថបទទាក់ទង៖ នាយករដ្ឋមន្រ្តី ផ្តល់អនុសាសន៍៣ចំណុច ដើម្បីរៀបចំទីក្រុងឆ្លាតវៃអាស៊ាន