App ថ្មីនៅថៃ អាចជួលមិត្តស្រីរយៈពេល៥ម៉ោង តម្លៃចាប់ពី ៧៧ដុល្លារ
- 2018-05-22 02:33:37
- ចំនួនមតិ 0 | ចំនួនចែករំលែក 0
App ថ្មីនៅថៃ អាចជួលមិត្តស្រីរយៈពេល៥ម៉ោង តម្លៃចាប់ពី ៧៧ដុល្លារ
ចន្លោះមិនឃើញ
YouEx ជាកម្មវិធីស្មាតហ្វូនដែលកំពុងទទួលបានការចាប់អារម្មណ៍នៅក្នុងប្រទេសថៃ។ វាជាកម្មវិធីដែលអាចអនុញ្ញាតឲ្យអ្នកជួលមនុស្សស្រី ឬមនុស្សប្រុសណាត់ជួប ឬដើរលេងជាមួយបាន។ តម្លៃជួលគឺចាប់ផ្ដើមពី ៧៧ដុល្លារ ដល់ ២៤៨ដុល្លារ។
បើយោងតាមសារព័ត៌មាន Coconut របស់ថៃ បានឲ្យដឹងថា YouEx ត្រូវបានបង្កើតឡើងរយៈពេល១ឆ្នាំមកហើយ តែទើបល្បីកាលពីពេលថ្មីៗនេះក្រោយពីមានទំព័រហ្វេសប៊ុកមួយបានចែករំលែកនូវរូបថតផ្ទាំងពាណិជ្ជកម្មរបស់ YouEx។ ក្នុងរូប គេសង្កេតឃើញមានបុរសវ័យកណ្ដាលម្នាក់អង្គុយលើសាឡុងជាមួយនឹងស្រីស្អាត៣នាក់ រួចមានពាក្យមួយឃ្លាថា៖ "ជួលមិត្តភ័ក្ដិ។ YouEx"។
នៅក្នុងកម្មវិធី YouEx ក្រោយពីអ្នកបានជ្រើសយកមិត្តស្រី ឬមិត្តប្រុសរួច អ្នកអាចរើសយកសកម្មភាពដែលអ្នកចង់ធ្វើជាមួយពួកគេដូចជា ទៅញ៉ាំអាហារ ទៅមើលកុន ដើរផ្សារ ឬក៏អាចជួលសម្រាប់ការងារដើរបង្ហាញម៉ូដថែមទៀតផង។
មនុស្សមួយចំនួនទំនងជាគិតថានេះជាទង្វើពេស្យា តែយ៉ាងណាមិញ បើតាមគោលការណ៍របស់ YouEx បង្ហាញថា វាមិនមែនជាការលក់ខ្លួនប្រាណនោះទេ តែជាការជួលមិត្តសម្រាប់ជជែក ឬដើរលេងជាមួយតែប៉ុណ្ណោះ។ បន្ថែមពីនេះ YouEx បញ្ជាក់ទៀតថា អ្នកដែលត្រូវគេជួល អាចរាយការណ៍ទៅក្រុមហ៊ុនបាន ប្រសិនបើអតិថិជនព្យាយាមបំពានខ្លួនប្រាណរបស់ពួកគេ៕