កម្ពុជា-ថៃ ផ្ដល់ភាពស្របច្បាប់ដល់ពលករកម្ពុជាជាង ៣០ម៉ឺននាក់ ក្នុងចំណោមពលករខុសច្បាប់...
- 2018-05-22 06:36:11
- ចំនួនមតិ 0 | ចំនួនចែករំលែក 0
កម្ពុជា-ថៃ ផ្ដល់ភាពស្របច្បាប់ដល់ពលករកម្ពុជាជាង ៣០ម៉ឺននាក់ ក្នុងចំណោមពលករខុសច្បាប់...
ចន្លោះមិនឃើញ
ប្រទេសថៃ និងប្រទេសកម្ពុជាបានរួមគ្នាផ្តល់ភាពស្របច្បាប់ជូនពលករកម្ពុជាជាង ៣០ម៉ឺននាក់រួចហើយ ក្នុងចំណោមពលករជាង ៤០ម៉ឺននាក់ ដែលកំពុងបម្រើការងារ ដោយខុសច្បាប់នៅក្នុងប្រទេសថៃ។ នេះបើតាមការចេញផ្សាយលើហ្វេសប៊ុកផេករបស់ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២២ ខែឧសភា ២០១៨នេះ។
លោករដ្ឋមន្រ្តីក្រសួងការងារថា ពលករកម្ពុជា ដែលបម្រើការងារដោយគ្មានឯកសារស្របច្បាប់ នៅក្នុងប្រទេសថៃ ពីមុនមកនោះ ឥឡូវនេះបានទទួលភាពស្របច្បាប់ជិតអស់ហើយ និងកំពុងបន្តធ្វើកិច្ចការនេះឱ្យបានរួចរាល់ នៅមុនដំណាច់ ខែមិថុនា ឆ្នាំ២០១៨ខាងមុខនេះ។
លោករដ្ឋមន្រ្តីក៏បានបញ្ជាក់ទៀតថា នៅពាក់កណ្តាលខែមិថុនា ក្នុងឆ្នាំនេះ លោកនឹងដឹកនាំគណប្រតិភូក្រសួងការងារ ទៅបំពេញទស្សនកិច្ចផ្លូវការនៅប្រទេសថៃ ដើម្បីពិនិត្យចុងក្រោយ និងដោះស្រាយបញ្ហាដែលនៅសេសសល់។ ក្រៅពីនេះ លោកខិតខំជំរុញល្បឿន នៃកិច្ចសហប្រតិបត្តិការលើវិស័យអប់រំ បណ្ដុះបណ្ដាល បច្ចេកទេស និងវិជ្ជាជីវៈ ក៏ដូចជាវិស័យដទៃទៀត ឱ្យបានល្អ និងមានប្រសិទ្ធភាព។
សូមបញ្ជាក់ថា បើតាមតួលេខរបស់ក្រសួងការងារថៃ កាលពីខែកក្កដា ឆ្នាំ២០១៧ ពលករកម្ពុជា ដែលកំពុងតែធ្វើការងារនៅប្រទេសថៃ មានចំនួន១លាន ៥ម៉ឺននាក់ ទាំងស្របច្បាប់ និងមិនស្របច្បាប់៕