គ.ជ.ប រំពឹងថា ប្រជាពលរដ្ឋនឹងចូលរួមបោះឆ្នោតលើសពី ៥០%

2018-05-24 10:11:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងទៅកាន់អ្នកសារព័ត៌មាននៅថ្ងៃទី២៤ ខែឧសភា ឆ្នាំ២០១៨នេះ ដោយបង្ហាញក្តីរំពឹងថា ការបោះឆ្នោតខាងមុខនេះ នឹងមានប្រជាពលរដ្ឋចូលរួមលើសពី ៥០%។

លោកបានលើកឡើងថា មូលហេតុដែលលោកហ៊ានសន្និដ្ឋានដូច្នេះ គឺផ្អែកទៅលើតួលេខអ្នកបានទៅចូលរួមបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ ដោយមានគណបក្ស១ ទទួលបានសំឡេងឆ្នោតដល់ទៅជាង ៣លាន ពោលគឺជាង ៥០% រួចទៅហើយ។ ក្រៅពីនេះក៏នៅមានអ្នកគាំទ្រគណបក្សចំនួន ១៩ផ្សេងទៀតផងដែរ។

លោក ហង្ស ពុទ្ធា ក្នុងកិច្ចប្រជុំ១នៅ គ.ជ.ប កាលពីពេលកន្លងមក

គួររំលឹកថា កាលពីបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ គឺមានអ្នកចូលរួមបោះឆ្នោត ៧,១០លាននាក់ ក្នុងចំណោមអ្នកមានឈ្មោះបោះឆ្នោតជាង ៧,៨៦លាននាក់ (ស្មើនឹងជាង ៩០,៣៧%)។ ក្នុងនោះ គណបក្សប្រជាជនកម្ពុជា ទទួលបានសំឡេងឆ្នោត ៣,៥៤លាន (៥០,៧៦%) និងគណបក្សសង្គ្រោះជាតិ (បច្ចុប្បន្នត្រូវបានរំលាយហើយ) ទទួលបានសំឡេងឆ្នោត ៣,០៤លាន (៤៣,៨៣%)។

ចំណែកការការបោះឆ្នោតជ្រើសតាំងតំណាងរាស្រ្ត កាលពីឆ្នាំ២០១៣ គឺមានប្រជាពលរដ្ឋប្រមាណជាង ៦,៦លាននាក់ (៦៨,៥%) បានទៅចូលរួមបោះឆ្នោត ក្នុងចំណោមអ្នកមានឈ្មោះបោះឆ្នោតសរុប ៩,៦៧លាននាក់។ ក្នុងនោះគណបក្សប្រជាជនកម្ពុជា ទទួលបានសំឡេងឆ្នោត ៣,២៣លាន (៤៨,៨៣%) និងគណបក្សសង្គ្រោះជាតិ ទទួលបានសំឡេងឆ្នោត ២,៩៤លាន (៤៤,៤៦%)។

ប្រជាពលរដ្ឋចូលរួមបោះឆ្នោតឃុំសង្កាត់ឆ្នាំ២០១៧ នៅមណ្ឌល១កន្លែង ក្នុងរាជធានីភ្នំពេញ

មន្រ្តីជាន់ខ្ពស់ គ.ជ.ប រូបនេះ ក៏បានអះអាងដែរថា ការបោះឆ្នោតតំណាងរាស្រ្តនាខែកក្កដាខាងមុខនេះ នឹងប្រព្រឹត្តដោយរលូន បើទោះបីជាគ្មានការចូលរួមពីគណបក្សប្រឆាំង និងបណ្តាអង្គការមួយចំនួនដែលតាំងខ្លួនឯករាជ្យ ដើម្បីចូលរួមក្នុងការអង្កេតការណ៍ក៏ដោយ៕

ប្រភព៖ Vayo Fm ប្រែសម្រួល៖ សំភី