កិច្ចព្រមព្រៀងបញ្ជូនជនភៀសខ្លួនពីអូស្រ្តាលីមកកម្ពុជា នឹងត្រូវបញ្ចប់ចុងឆ្នាំនេះ

2018-06-05 04:59:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងមហាផ្ទៃកម្ពុជា បានឱ្យដឹងថា កិច្ចព្រមព្រៀង ស្ដីពីការបញ្ជួនជនភៀសរវាងកម្ពុជានិងអូស្ត្រាលី នឹងត្រូវអស់សុពលភាពនៅខែសីហា ឆ្នាំ២០១៨ខាងមុខនេះហើយ។ នេះបើតាមការចុះផ្សាយរបស់កាសែត ជាភាសាអង់គ្លេស KhmerTimes នៅព្រឹកថ្ងៃអង្គារនេះ។

អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់កាសែត KhmerTimes ថា កម្ពុជានឹងធ្វើការពិនិត្យឡើងវិញទៅលើកិច្ចព្រមព្រៀងស្តីពីការបញ្ជូនជនភៀសខ្លួននេះ នៅពេលដែលវាអស់សុពលភាព នៅខែសីហា។

លោក ខៀវ សុភ័គ បានបន្ថែមទៀតថា មកទល់នឹងពេលនេះ កិច្ចព្រមព្រៀងខាងលើ បានចូលជាធរមានអស់រយៈពេលជាង ២ ឆ្នាំមកហើយ ប៉ុន្តែមានជនភៀសខ្លួនមួយចំនួនប៉ុណ្ណោះ ដែលសម្រេចចិត្តមកកាន់ប្រទេសកម្ពុជា បន្ទាប់មក ពួកគេបានចាកចេញពីកម្ពុជា ទៅស្រុកកំណើតរបស់គេវិញ។ សព្វថ្ងៃនេះ មានជនភៀសខ្លួនតែម្នាក់ប៉ុណ្ណោះ ដែលកំពុងរស់នៅក្នុងប្រទេសកម្ពុជា។

លោក ខៀវ សុភ័គ ថ្លែងនាពេលកន្លងមក

អ្នកនាំពាក្យរូបនេះ បន្តថា៖ "កម្ពុជា នឹងធ្វើការពិចារណាចំពោះរឿងនេះ ប៉ុន្តែវាក៏អាស្រ័យទៅលើភាគីខាងអូស្ត្រាលី ថាតើពួកគេចង់បន្តទៀត ឬអត់។ យើងតែងតែគោរពកិច្ចព្រមព្រៀងនេះជានិច្ច ប៉ុន្តែយើងក៏នឹងគោរពតាមការសម្រេចចិត្ត ដែលធ្វើឡើងដោយភាគីខាងអូស្ត្រាលីផងដែរ"។

សារព័ត៌មានអូស្ត្រាលី Australian Associated Press កាលពីថ្ងៃទី ៣១ ឧសភាកន្លងទៅ បានផ្សាយថាកិច្ចព្រមព្រៀង ស្ដីពីការបញ្ជួនជនភៀសរវាងកម្ពុជានិងអូស្ត្រាលី ដែលពុំទទួលបានជោគជ័យនោះ នឹងត្រូវបញ្ចប់នាចុងឆ្នាំ ២០១៨ ខាងមុខនេះហើយ។ ការផ្សាយនេះ ធ្វើឡើងដកស្រង់សម្តីរបស់ អគ្គនាយកដ្ឋានពាណិជ្ជកម្ម និងកិច្ចការបរទេសអូស្ត្រាលី អំឡុងពេលនៃកិច្ចប្រជុំព្រឹទ្ធសភាអូស្រ្តាលី។

សម្តេចនាយករដ្ឋមន្ត្រី ហ៊ុន សែន ចាប់ដៃជាមួយ នាយករដ្ឋមន្ត្រីអូស្ត្រាលី លោក Malcolm Turnbull នៅឯកិច្ចប្រជុំកំពូលអាស៊ាន-អូស្ត្រាលី កាលពីពេលកន្លងទៅ។ រូបភាព៖ AAP

គួររម្លឹកដែរថា កម្ពុជានិងអូស្ត្រាលី កាលពីឆ្នាំ ថ្ងៃទី ២៦ ខែកញ្ញា ឆ្នាំ ២០១៤ បានចុះហត្ថលេខា លើកិច្ចព្រមព្រៀងទទួលជនភៀសខ្លួនពីកោះណាវរុ(Nauru) មកតាំងទីលំនៅនៅកម្ពុជា។ ពិធីចុះហត្ថលេខាជាផ្លូវការនោះ ដឹកនាំដោយ លោក ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ និង លោក ស្កតម៉ូរីស៊ិន(Scott Morrison) រដ្ឋមន្រ្តីក្រសួងអន្តោប្រវេសន៍អូស្រ្តាលី៕

អត្ថបទ៖ អឹុម ម៉េងស៊ាង