កម្ពុជា ទទួលបានកម្ចី ១១០លានដុល្លារ ពី WB សម្រាប់ជួសជុលផ្លូវជាតិលេខ៤

2018-06-24 02:56:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ធនាគារពិភពលោក (WB) បានសម្រេចផ្តល់ជំនួយហិរញ្ញប្បទានគ្មានការប្រាក់ ចំនួន ១១០លានដុល្លារ ឱ្យកម្ពុជា សម្រាប់គម្រោងជួសជុលកែលម្អផ្លូវជាតិលេខ៤ ប្រវែងជាង ២០០គីឡូម៉ែត្រ។ នេះបើតាមសេចក្តីប្រកាសព័ត៌មានរបស់ធនាគារពិភពលោក កាលពីថ្ងៃទី២២ ខែមិថុនា ឆ្នាំ២០១៨។

តាមរយៈជំនួយនេះ ផ្លូវជាតិលេខ៤ ដែលជាផ្លូវតភ្ជាប់ពីរាជធានីភ្នំពេញដោយផ្ទាល់ ទៅកំពង់ផែសមុទ្រទឹកជ្រៅនៅក្នុងខេត្តព្រះសីហនុនោះ នឹងទទួលបានការបង្កើនគុណភាពឱ្យល្អជាងមុន តាមរយៈការអ៊ុតកៅស៊ូថ្មីពីលើ និងការរៀបចំឡើងវិញនូវចិញ្ចើមសងខាងផ្លូវ ការដាក់លូបង្ហូរទឹក និងការធ្វើស្ពាន នៅក្នុងតំបន់ងាយលិចទឹក នៅតាមដងផ្លូវនេះ។

ផ្លូវជាតិលេខ៤ ត្រង់ចំណុចចម្ការដូងប្រេង នៅក្នុងខេត្តព្រះសីហនុ (រូបថត៖ ខែមករា ឆ្នាំ២០១៨)

សេចក្តីប្រកាសនេះ បានដកស្រង់សម្តីលោក ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន ឱ្យដឹងថា ការកែលម្អស្ថានភាពផ្លូវជាតិលេខ៤នេះ នឹងជួយកាត់បន្ថយការចំណាយពេលវេលា និងការចំណាយលើការដឹកជញ្ជូន ដែលអាចជួយធ្វើឱ្យសេដ្ឋកិច្ចរបស់កម្ពុជា កាន់តែមានភាពប្រកួតប្រជែងខ្លាំងឡើងថែមទៀតនៅក្នុងតំបន់។

ចំណែកលោកស្រី អ៊ីហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំនៅកម្ពុជា បានមានប្រសាសន៍ថា ការខ្វះចន្លោះផ្នែកហេដ្ឋារចនាសម្ព័ន្ធ ជាការប្រឈមដ៏ធំមួយដល់សមត្ថភាពប្រកួតប្រជែង និងការអភិវឌ្ឍវិស័យឯកជន។ គម្រោងដែលនឹងកែលម្អស្ថានភាពផ្លូវជាតិលេខ៤នេះ នឹងជួយដោះស្រាយភាពប្រឈមទាំងនោះ ហើយវានឹងពង្រីកកាលានុវត្តភាពផ្នែកសេដ្ឋកិច្ចសម្រាប់ពលរដ្ឋកម្ពុជា។

សេចក្តីប្រកាសដដែល បានបន្ថែមថា ជំនួយហិរញ្ញប្បទាននេះ នឹងត្រូវបានយកទៅប្រើប្រាស់ផងដែរ ដើម្បីបង្កើនសមត្ថភាពរបស់ស្ថានីយថ្លឹងរថយន្តបច្ចុប្បន្ន និងជួយកាត់បន្ថយហានិភ័យ ដែលបណ្តាលមកពីការដឹកទំនិញលើសទម្ងន់។ សុវត្ថិភាពផ្លូវ នឹងត្រូវចាត់ទុកជាអាទិភាពចម្បង តាមរយៈការកំណត់សញ្ញាតំបន់ល្បឿនមានកម្រិត ផ្លូវមានសុវត្ថិភាព និងកែលម្អផ្លូវខ្នាតតូចភ្ជាប់ផ្លូវឡើងមកផ្លូវជាតិ ដែលរួមមានទាំងការដំឡើងស្លាកសញ្ញាបង្ហាញផ្លូវ បង្គោលភ្លើងប្រើដោយថាមពលពន្លឺព្រះអាទិត្យ និងកាមេរ៉ាចាប់ល្បឿនរថយន្តទៀតផង៕

អត្ថបទ៖ សំភី