ភាពច្របូកច្របល់កើតឡើងនៅបារាំង ក្រោយក្រុមមាន់គកលើកពាន World Cup
- 2018-07-16 06:14:17
- ចំនួនមតិ 0 | ចំនួនចែករំលែក 0
ភាពច្របូកច្របល់កើតឡើងនៅបារាំង ក្រោយក្រុមមាន់គកលើកពាន World Cup
ចន្លោះមិនឃើញ
ក្នុងការអបអរនូវជ័យជម្នះរបស់ក្រុមបារាំង ដែលបានក្លាយជាជើងឯក World Cup គេសង្កេតឃើញ មានអំពើហិង្សារវាងប៉ូលិស និងអ្នកគាំទ្រ បានផ្ទុះឡើងជាច្រើនលើក នៅក្នុងទីក្រុងមួយចំនួន ក្នុងប្រទេសបារាំង។ ហាងមួយចំនួន ធុងសំរាម និងរបស់របរនៅទីសាធារណៈជាច្រើន ត្រូវបានបំផ្លិចបំផ្លាញ។
នៅក្រុង Lyon អ្នកគាំទ្របាននាំគ្នាគប់ធុងសំរាមដាក់ក្រុមសមត្ថកិច្ច។ ក្នុងតំបន់ Bellecour ដែលជាកន្លែងប្រមូលផ្ដុំអ្នកគាំទ្រ បានកើតមានអំពើហិង្សារហូតដល់មានការប្រើប្រាស់គ្រាប់បែកបង្ហូរទឹកភ្នែកដោយសមត្ថកិច្ច។ រីឯក្រុមពន្លត់អគ្គិភ័យ បានធ្វើការពន្លត់ភ្លើងចេញពីធុងសំរាមជាច្រើន ដែលត្រូវបានដុតដោយអ្នកគាំទ្រមួយចំនួន។
នៅក្រុង Marseille អ្នកគាំទ្របានគប់ផាវ កាំជ្រួចផ្សែងដាក់សមត្ថកិច្ច ដែលបានប្រើប្រាស់គ្រាប់បែកបង្ហូរទឹកភ្នែកមកលើពួកគេ។ លើសពីនេះ ក្រុមខ្លះបានវាយបំបែកកញ្ចក់រថយន្ត និងដុតធុងសំរាម ផងដែរ។ ក្នុងហេតុការណ៍នៅ Marseille ប៉ូលិស បានចាប់ខ្លួនមនុស្សយ៉ាងតិច ១០នាក់។
ហេតុការណ៍ស្រដៀងគ្នានេះ ក៏បានកើតឡើងនៅក្រុង Rouen ផងដែរ។ អ្នកកាសែត ២រូប បានទទួលរងរបួស ដោយសារក្រុមអ្នកគាំទ្រវាយ។ សមត្ថកិច្ច ក៏បានចុះធ្វើអន្តរាគមន៍ផងដែរ។
នៅក្រុង Bordeaux អ្នកគាំទ្រខ្លះ បានដោះសម្លៀកបំពាក់ រួចដើរនៅតាមទីសាធារណៈ។ ក្នុងនោះមានការដុតរថយន្តមួយគ្រឿងផងដែរ។
សូមបញ្ជាក់ថា នេះជាលើកទី២ហើយ ដែលបារាំងបានក្លាយជាជើងឯក World Cup បន្ទាប់ពីឈ្នះលើកដំបូង កាលពី២០ឆ្នាំមុន។ បារាំង បានយកឈ្នះក្រូអាត ដោយលទ្ធផល ៤-២ នៅវគ្គផ្តាច់ព្រ័ត្រ World Cup 2018 ដែលរៀបចំឡើងនៅក្រុងមូស្គូ ប្រទេសរុស្ស៊ី៕