ខេត្ត១ ជួបបញ្ហាកង្វះទឹក ខណៈខេត្តមួយចំនួនកំពុងប្រឈមនឹងទឹកជំនន់

2018-07-21 02:21:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទោះបីជាមានបាតុភូតសម្ពាធបរិយាកាស ភ្លៀងរាយប៉ាយបង្កជាជំនន់ទឹកភ្លៀងនៅខេត្តមួយចំនួនក៏ដោយ ក៏ខេត្តបន្ទាយមានជ័យនៅតែគ្មានទឹកជំនន់នោះទេ។ ទោះយ៉ាងណា របាយទឹកភ្លៀងបានជួយឲ្យចំណុចវាលស្រែនៅឃុំខ្លះនៃស្រុក ក្រុងទាំង៩ ក្នុងខេត្តបន្ទាយមានជ័យដែលខ្វះទឹកហើយបង្កប៉ះពាល់និងខូចខាតដំណាំស្រូវជាង ៦០០០ ហិកតាកន្លងមកនោះ មានទឹក ហើយដំណាំស្រូវបានរស់ឡើងវិញ។

យោងមន្ត្រីអាជ្ញាធរដែនដីស្រុក ក្រុងទាំង៩ និងជំនាញមន្ទីរកសិកម្មក៏ដូចមន្ទីរធនធានទឹកបានឲ្យដឹងកាលពីថ្ងៃទី២០កក្កដាថា នៅគោលដៅនានានៃស្រុក ក្រុងទាំង៩របស់ខេត្តបន្ទាយមានជ័យ មកទល់ពេលនេះគ្មានទឹកជំនន់នោះ ឬក៏អាចថា មានទឹកមិនគ្រប់ និងមានត្រឹមសមល្មមប៉ុណ្ណោះ។

ចំណែកលោក យឹម ប៊ុនរ៉ុម ប្រធានមន្ទីរធនធានទឹកនិងឧតុនិយមខេត្តបន្ទាយមានជ័យបានឲ្យដឹងថា ប្រព័ន្ធប្រឡាយទាំងឡាយក្នុងទូទាំងខេត្ត ពុំទាន់ទាំងមានទឹកប្រៀបដូចឆ្នាំមុនៗទេ។ ប្រឡាយខ្លះមានទឹកសមល្មមសម្រាប់ស្រោចស្រព ឯប្រឡាយខ្លះទៀត ខ្វះឬគ្មានទាំងទឹកសម្រាប់បូមបាចផង។

សូមរំឭកថា អំឡុងពីខែឧសភា មិថុនា និងកក្កដា កន្លងមកនេះ ដំណាំស្រូវស្រូវវស្សានៅកន្លែងខ្លះក្នុងទូទាំងខេត្តបន្ទាយមានជ័យ បានជួបបញ្ហាខ្វះទឹក ព្រោះភ្លៀងធ្លាក់មិនចំ។ លោក ប៉ាង វណ្ណាសេដ្ឋប្រធានមន្ទីរកសិកម្មខេត្តបន្ទាយមានជ័យ និងមន្ត្រីអាជ្ញាធរដែនដី ព្រមទាំងកសិករឲ្យដឹងថា គ្រោះរាំងស្ងួតបានបង្កឲ្យស្រូវប្រាំងនិងស្រូវស្រាលដើមរដូវ ព្រមទាំងស្រូវរដូវវស្សាលើផ្ទៃដីទំហំជាង៦០០០ហិកតានៅឃុំ សង្កាត់ខ្លះ នៃស្រុក ក្រុងទាំង៩ បានរងផលប៉ះពាល់និងឈានទៅដល់ការខូចខាត។ ក៏ប៉ុន្តែ ពីថ្ងៃទី១៨ ខែកក្កដាមក ស្រូវទាំងនោះក៏បានទទួលទឹកភ្លៀងដោយសារកត្តាបាតុភូតធម្មជាតិដែលមានភ្លៀងធ្លាក់រាយប៉ាយស្ទើរគ្រប់កន្លែង៕