គណបក្សប្រជាធិបតេយ្យមូលដ្ឋាន ប្រកាសមិនដកខ្លួនចេញពីការបោះឆ្នោតឡើយ

2018-07-22 02:18:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក យ៉ង់ សាំងកុមារ បេក្ខជននាយករដ្ឋមន្ត្រីរបស់គណបក្សប្រជាធិបតេយ្យមូលដ្ឋាន បានប្រកាសថា គណបក្សនេះ មិនដកខ្លួនចេញពីការបោះឆ្នោតជ្រើសតាំងតំណាងរាស្ត្រ នីតិកាលទី៦ នោះទេ ដោយសារមានការលើកទឹកចិត្ត និងការគាំទ្រពីប្រជាពលរដ្ឋ។ ការប្រកាសនេះ បានធ្វើឡើងនៅព្រឹកថ្ងៃទី២២ ខែកក្កដានេះ ក្នុងយុទ្ធនាការឃោសនាបោះឆ្នោត នៅសង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។

លោក យ៉ង់ សាំងកុមារ បានបញ្ជាក់យ៉ាងដូច្នេះថា៖ «ទោះបីជាជួបការលំបាកយ៉ាងណាក៏ដោយ ត្រូវតែបង្ខំចិត្តទៅមុខ ដោយសារស្ថានភាពមានការកែលំអរ សម្តេចក្រឡាហោម ស ខេង បញ្ជូនសារ ឱ្យអាជ្ញាធរឈប់មានការរើសអើងគណបក្សនយោបាយ គឺជារឿងវិជ្ជមានមួយទៀត បូកកត្តាទាំងអស់ចូលគ្នា យើងធ្វើការសម្រេចចិត្តថា យើងនឹងបន្តដំណើរទៅមុខទៀត អត់ដកខ្លួនចេញពីការបោះឆ្នោតទេ ប៉ុន្តែយើងនៅចាំមើលថ្ងៃបោះឆ្នោត និងថ្ងៃរាប់សន្លឹកឆ្នោតទៀត»។

លោក យ៉ង់ សាំងកុមារ ថ្លែងទៅកាន់អ្នកសារព័ត៌មាន ក្នុងអំឡុងយុទ្ធនាការឃោសនាបោះឆ្នោត នៅកំបូល នាព្រឹកថ្ងៃទី២២កក្កដា ២០១៨

លោករំពឹងថា មានប្រជាពលរដ្ឋយ៉ាងតិចណាស់ ៧៥% នឹងទៅបោះឆ្នោត ហើយគណបក្សប្រជាធិបតេយ្យមូលដ្ឋាន នឹងខិតខំជំរុញឱ្យប្រជាពលរដ្ឋទៅបោះឆ្នោតលើស៨០% ព្រោះកាលណាប្រជាពលរដ្ឋទៅបោះឆ្នោតកាន់តែច្រើន គណបក្ស នឹងមានឱកាសឈ្នះកាន់តែច្រើន។

សូមរំលឹកថា កាលពីសប្តាហ៍មុន លោក សាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋាន បានព្រមានថា គណបក្សនេះ នឹងដកខ្លួនចេញពីការបោះឆ្នោតជ្រើសតាំងតំណាងរាស្រ្តនីតិកាលទី៦ ប្រសិនបើអាជ្ញាធរមូលដ្ឋាន មិនសហការជាមួយគណបក្ស ក្នុងអំឡុងពេលយុទ្ធនាការឃោសនាបោះឆ្នោតនេះទេនោះ៕

អត្ថបទ៖ សោភា