ស្រ្តីបឹងកក់វ័យ ៧៦ឆ្នាំ ត្រូវតុលាការកោះហៅឱ្យចូលឆ្លើយរឿង "ជេរប្រមាថ និងគំរាមសម្លាប់"

2018-08-17 07:12:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សកម្មជនដីធ្លីក្នុងសហគមន៍បឹងកក់វ័យ ៧៦ឆ្នាំ អ្នកស្រី ង៉ែត ឃុន ត្រូវបានសាលាដំបូងរាជធានីភ្នំពេញ កោះហៅឱ្យចូលឆ្លើយដោះសារពីការចោទប្រកាន់ថា "ជេរប្រមាថជាសាធារណៈ និងគំរាមថានឹងសម្លាប់" ប្រព្រឹត្តនៅចំណុចផ្ទះលេខ១៣៤ ផ្លូវលេខ៨០ ភូមិ២៤ ក្រុម៣០៣ សង្កាត់ស្រះចក ខណ្ឌដូនពេញ រាជធានីភ្នំពេញ។ នេះបើយោងតាមដីកាកោះហៅរបស់លោក តុប ឈុនឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះកាលពីថ្ងៃទី៦ ខែសីហា ឆ្នាំ២០១៨។

អ្នកស្រី ង៉ែត ឃុន ក្នុងពេលចេញពីការឆ្លើយបំភ្លឺ នៅសាលាដំបូងរាជធានីភ្នំពេញ កាលពីថ្ងៃទី៣ ខែវិច្ឆិកា ឆ្នាំ២០១៦។ រូបថត៖ RFA

លោកព្រះរាជអាជ្ញារង បានបង្គាប់ឱ្យអ្នកស្រី ង៉ែត ឃុន ហៅយាយមុំាមី ដែលមានទីលំនៅបច្ចុប្បន្នក្នុងសង្កាត់ស្រះចក ចូលខ្លួនឆ្លើយដោះសារពីការចោទប្រកាន់ខាងលើនេះ នៅព្រឹកថ្ងៃទី២៤ ខែសីហា ឆ្នាំ២០១៨។

សូមរំលឹកថា កាលពីថ្ងៃទី១៦ ខែមីនា ឆ្នាំ២០១៧ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចោទប្រកាន់ទៅលើឈ្មោះ ទេព វន្នី, ហេង មុំ, ង៉ែត ឃុន, ឆេង លាភ, គង់ ចាន់ថា និង តុល ស្រីពៅ ពីបទ "ជេរប្រមាថជាសាធារណៈ និងគំរាមថានឹងសម្លាប់" ដែលបានប្រព្រឹត្តធ្វើឡើងកាលពីថ្ងៃទី២០ ខែមីនា ឆ្នាំ២០១២៕

អត្ថបទ៖ សំភី