តម្លៃនាំចេញម្រេចវៀតណាម ដាំក្បាលចុះជាង៦០%

2018-09-05 07:54:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងកសិកម្ម និងអភិវឌ្ឍន៍ជនបទវៀតណាម បានឲ្យដឹងថា តម្លៃមធ្យមនៃម្រេចនាំចេញវៀតណាម បានធ្លាក់ចុះ ៦២% ក្នុងរយៈពេល៨ខែ ឆ្នាំ២០១៨ បើធៀបទៅនឹងរយៈពេលដូចគ្នា កាលពីឆ្នាំ២០១៧។ ម្រេចវៀតណាម ១តោន មានតម្លៃប្រហែល ៣៣៣០ ដុល្លារអាមេរិក។

កសិករវៀតណាម កំពុងរៀបចំដី នៅចម្ការម្រេច នៅខេត្ត Gia Lai ប្រទេសវៀតណាម (រូបថត៖ VNA)

ក្រសួងដដែលបានបន្ថែមថា តម្លៃម្រេចនៅលើសាកលលោក ជួបវិបត្តិក្នុងឆ្នាំនេះ ដោយសារតម្រូវការថយចុះ និងការត្រៀមប្រមូលផលម្រេចក្នុងប្រទេសអ្នកនាំចេញធំៗដូចជា ឥណ្ឌូណេស៊ី ម៉ាឡេស៊ី និង ប្រេស៊ីល។

របាយការណ៍របស់ក្រសួងកសិកម្ម និងអភិវឌ្ឍន៍ជនបទវៀតណាម បានឲ្យដឹងដែរថា ទីផ្សារធំបំផុតរបស់ម្រេចវៀតណាម គឺ សហរដ្ឋអាមេរិក ឥណ្ឌា ប៉ាគីស្ថាន អាល្លឺម៉ង់ និងអារ៉ាប់រួម។ ក្នុង ៨ខែដើមឆ្នាំនេះ ការនាំចេញម្រេចវៀតណាម មានចំនួន ១៧៣០០០តោន ស្មើនឹង ៥៧៦លានដុល្លារអាមេរិក។ ក្នុងខែសីហាកន្លងទៅ វៀតណាមនាំចេញម្រេច ២ម៉ឺនតោន។

កសិករវៀតណាម ប្រឈមមុខនឹងការខាតបង់ បន្ទាប់ពីតម្លៃម្រេចក្នុងស្រុក ធ្លាក់ចុះស្ទើរស្មើតម្លៃផលិត ដោយគិតត្រឹមចុងខែសីហាកន្លងទៅ ម្រេចមានតម្លៃពី ២,២ដុល្លារ ទៅ ២,៨ដុល្លារក្នុង១គីឡូក្រាម៕

ប្រភព៖ Vietnam News ប្រែសម្រួល៖ លាភ.