ក្រសួងបរិស្ថាន៖ ទឹកសមុទ្រកំពង់សោមល្អក់ មិនបង្កជាបញ្ហាធ្ងន់ធ្ងរទេ
- 2018-09-14 07:58:12
- ចំនួនមតិ 0 | ចំនួនចែករំលែក 0
ក្រសួងបរិស្ថាន៖ ទឹកសមុទ្រកំពង់សោមល្អក់ មិនបង្កជាបញ្ហាធ្ងន់ធ្ងរទេ
ចន្លោះមិនឃើញ
ស្ថានភាពល្អក់កករទឹកនៅតាមឆ្នេរសមុទ្រមួយចំនួន រួមទាំងឆ្នេរព្រែកត្រែងផងនោះ មិនបង្កជាបញ្ហាប៉ះពាល់ធ្ងន់ធ្ងរនោះឡើយ។ ការល្អក់កករនេះ ដោយសារតែសកម្មភាពអភិវឌ្ឍនៅខេត្តព្រះសីហនុ កំពុងមានច្រើន ហើយប៉ុន្មានថ្ងៃនេះ មានភ្លៀងធ្លាក់ច្រើនហូរនាំយកដីចូលទៅក្នុងសមុទ្រ ទើបនាំឲ្យមានទឹកសមុទ្រល្អក់។ នេះបើយោងតាមការបំភ្លឺរបស់ក្រសួងបរិស្ថាន។
លោក នេត្រ ភក្ត្រា អ្នកនាំពាក្យក្រសួងបរិស្ថាន បានអះអាងថា បញ្ហាខាងលើនេះ មិនធ្វើឱ្យប៉ះពាល់ដល់ទឹក និងឆ្នេរសមុទ្រកម្ពុជានោះទេ ដោយសារតែក្រសួងបានឱ្យមន្ត្រីជំនាញចុះទៅសិក្សាស្រាវជ្រាវ និងវាយតម្លៃពីផលប៉ះពាល់រួចហើយ។ ជាមួយគ្នានេះ លោកនេត្រ ភក្ត្រា រំពឹងថា ប៉ុន្មានថ្ងៃក្រោយ ទឹកសមុទ្រនឹងប្រែពីល្អក់មកថ្លាវិញជាមិនខាន។
ចំណែករឿងក្រុមហ៊ុនវិនិយោគមួយ ចាក់ដីលុបឆ្នេរព្រែកត្រែង ដែលជាផ្នែកមួយបណ្ដាលទឹកសមុទ្រល្អក់កករនោះ លោកនេត្រ ភក្ត្រា បញ្ជាក់ថា ក្រសួងបរិស្ថាន នឹងបញ្ជូនមន្ត្រីជំនាញខ្លួនចុះទៅសិក្សាស្រាវជ្រាវ និងវាយតម្លៃពីផលប៉ះពាល់ផងដែរ បន្ទាប់ពីមានការរិះគន់ពីសំណាក់ប្រជាពលរដ្ឋ ។
គួររំលឹកថា ករណីទឹកសមុទ្រល្អក់កករនៅតាមឆ្នេរសមុទ្រមួយចំនួន រួមទាំងឆ្នេរព្រែកត្រែងផងដែរនោះ ត្រូវបានប្រជាពលរដ្ឋមួយចំនួន ព្រួយបារម្ភខ្លាចប៉ះពាល់ដល់គុណភាពទឹក និងឆ្នេរសមុទ្ររបស់កម្ពុជា ដែលជាប់ជាឆ្នេរស្អាតនៅលើពិភពលោក ជាពិសេសការចាក់ដីនៅឆ្នេរព្រែកត្រែងតែម្ដង ដែលធ្វើប្រជាពលរដ្ឋរិះគន់ខ្លាំងនៅលើបណ្ដាញសង្គម៕