ស៊ី ជីនពីង ទូលព្រះមហាក្សត្រកម្ពុជាថា ទំនាក់ទំនងប្រទេសទាំងពីរកាន់តែរឹងមាំ និងសំខាន់

2018-09-20 01:39:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ី ជីនពីង ប្រធានាធិបតីចិន និងភរិយារបស់លោក គឺលោកស្រី Peng Liyuan បានជួបជាមួយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ នៅក្រុងប៉េកាំង កាលពីថ្ងៃទី១៩ ខែកញ្ញា ២០១៨ ម្សិលមិញ។

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជួបជាមួយលោក ស៊ី ជីនពីង ប្រធានាធិបតីចិន នៅក្រុងប៉េកាំង កាលពីថ្ងៃទី១៩ ខែកញ្ញា ២០១៨/ រូបភាព៖ Xinhua

អំឡុងជំនួបនោះ លោក ស៊ី បានបញ្ជាក់ថា ទំនាក់ទំនងមិត្តភាព ចិន-កម្ពុជា កំពុងកើនឡើងកាន់តែរឹងមាំ និងសំខាន់ ចាប់តាំងការបង្កើតទំនាក់ទំនងការទូតកាលពី ៦០ឆ្នាំមុន។

លោក ស៊ី ក៏បានលើកឡើងផងដែរថា លោកបានជួបជាមួយព្រះមហាក្សត្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជារៀងរាល់ឆ្នាំ ចាប់តាំងពីឆ្នាំ២០១៦ រហូតដល់បច្ចុប្បន្ន ដូចជាការជួបជុំគ្រួសារមួយអីចឹង។

ជាមួយគ្នានេះ លោក ស៊ី បានប្រកាសជំរុញកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយ កម្ពុជា-ចិន ទៅដល់ទម្ងន់ថ្មីមួយទៀត។

សូមបញ្ជាក់ថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ បានយាងចាកចេញពីមាតុភូមិឆ្ពោះទៅកាន់ទីក្រុងប៉េកាំង ប្រទេសចិន កាលពីថ្ងៃទី១០ ខែកញ្ញា ២០១៨ ដើម្បីពិនិត្យ និងព្យាបាលព្រះរាជសុខភាពរបស់ព្រះអង្គទាំងទ្វេរតាមវេជ្ជបញ្ជារបស់ក្រុមគ្រូពេទ្យចិន៕

ប្រភព៖ CGTN ប្រែសម្រួល៖ វាសនា