សម្តេច ហ៊ុន សែន អញ្ជើញទៅអាមេរិកព្រឹកនេះ ដើម្បីចូលរួមកិច្ចប្រជុំ UN
- 2018-09-27 01:23:13
- ចំនួនមតិ 0 | ចំនួនចែករំលែក 0
សម្តេច ហ៊ុន សែន អញ្ជើញទៅអាមេរិកព្រឹកនេះ ដើម្បីចូលរួមកិច្ចប្រជុំ UN
ចន្លោះមិនឃើញ
នាព្រឹកនេះ សម្តេចនាយករដ្ឋមន្រ្តី ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា ទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀត នៅក្រុងញ៊ូវយ៉ក សហរដ្ឋអាមេរិក ពីថ្ងៃទី២៧ ដល់ ៣០កញ្ញា ឆ្នាំ២០១៨។
បើតាមសេចក្តីព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ឱ្យដឹងថា មហាសន្និបាតនេះ នឹងប្រព្រឹត្តទៅក្រោមមូលបទ "ធ្វើឲ្យអង្គការសហប្រជាជាតិមានសារៈសំខាន់ ពាក់ព័ន្ធជាមួយប្រជាជនទាំងអស់: ភាពជាអ្នកដឹកនាំសកល និងការទទួលខុសត្រូវរួម សម្រាប់សង្គមប្រកបដោយសន្តិភាព សមធម៌ និងនិរន្តរភាព"។
នៅទីក្រុងញ៊ូវយ៉ក សម្តេច ហ៊ុន សែន នឹងធ្វើសេចក្តីថ្លែងការណ៍មួយផ្តោតលើការវិវត្តនាពេលថ្មីៗ និងសមិទ្ធផលសំខាន់ៗ ដែលរាជរដ្ឋាភិបាលសម្រេចបាន និងបញ្ហាតំបន់ និងអន្តរជាតិដែលជាការព្រួយបារម្ភរួម។
ក្នុងអំឡុងពេលស្នាក់នៅទីក្រុងញ៊ូវយ៉ក សម្តេច ហ៊ុន សែន ក៏នឹងជួបជាមួយសហគមន៍ខ្មែរដែលរស់នៅសហរដ្ឋអាមេរិក និងកាណាដា ផងដែរ។
ជាមួយគ្នានេះ សម្តេច ហ៊ុន សែន បានបង្ហោះនៅលើទំព័រហ្វេសប៊ុក ដោយបញ្ជាក់ថា ការចេញទៅចូលរួមកិច្ចប្រជុំខាងលើនេះ គឺជាការប្រើនយោបាយការទូតលើឆាកអន្តរជាតិ។ «ថ្ងៃនេះខ្ញុំសូមលាទៅបម្រើជាតិជាថ្មីម្តងទៀត ដោយប្រើនយោបាយការទូតនៅលើឆាកអន្តរជាតិ។ កម្ពុជា មិនអាចឱ្យគេបង្ខូចជាន់ឈ្លីទោះបីក្នុងរូបភាពណាមួយក៏ដោយ។ ខ្ញុំចេញទៅលើកនេះ ក៏នឹងចូលរួមផងដែរនូវការងារជាកិច្ចការតំបន់ និងអន្តរជាតិ ដែលកំពុងវិវត្តយ៉ាងតានតឹង និងស្មុគស្មាញ»៕
© រក្សាសិទ្ធិគ្រប់យ៉ាងដោយ Sabay ឆ្នាំ២០១៦
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
