រដ្ឋមន្រ្តីការបរទេសកម្ពុជា នឹងធ្វើទស្សនកិច្ចផ្លូវការនៅតួកគី នាដើមខែក្រោយ

2018-09-28 08:00:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងអញ្ជើញទៅបំពេញទស្សនកិច្ចផ្លូវការ នៅសាធារណរដ្ឋតួកគី ពីថ្ងៃទី១-៣ ខែតុលា ឆ្នាំ២០១៨ តបតាមការអញ្ជើញរបស់រដ្ឋាភិបាលតួកគី។ នេះបើតាមសេចក្តីប្រកាសព័ត៌មានរបស់ក្រសួងការបរទេស នៅថ្ងៃទី២៨កញ្ញានេះ។

លោកឧបនាយករដ្ឋមន្រ្តី នឹងជួបប្រជុំផ្លូវការជាមួយលោក ម៉េវលូត សាវូសូគ្លូរ រដ្ឋមន្រ្តីការបរទេសតួកគី ដើម្បីពិភាក្សាអំពីបញ្ហាផ្សេងៗ ដែលជាការព្រួយបារម្ភ និងយកចិត្តទុកដាក់រួម ក្នុងបរិបទនៃកិច្ចសហប្រតិបត្តិការទេ្វភាគី តំបន់ និងអន្តរជាតិ។ កិច្ចពិភាក្សានេះ ក៏នឹងផ្តោតលើកិច្ចខិតខំប្រឹងប្រែងនានា ដើម្បីពង្រឹងបន្ថែមទៀតផងដែរ នូវទំនុកចិត្តផ្នែកនយោបាយ និងស្វែងរកសក្តានុពលថ្មីៗ ក្នុងការជំរុញផលប្រយោជន៍ទៅវិញទៅមករបស់ប្រទេសទាំងពីរ។

លោក ប្រាក់ សុខុន ថ្លែងនាពេលកន្លងមក

នៅចុងបញ្ចប់នៃជំនួប រដ្ឋមន្ត្រីការបរទេសទាំងពីរ នឹងធ្វើជាអធិបតីក្នុងពិធីចុះហត្ថលេខាលើអនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងបណ្ឌិត្យសភាការទូត នៃក្រសួងការបរទេសតួកគី ហើយបន្ទាប់មក នឹងមានសន្និសីទព័ត៌មាន។

ក្នុងអំឡុងទស្សនកិច្ចនេះដែរ លោក ប្រាក់ សុខុន នឹងអញ្ជើញដាក់កម្រងផ្កា នៅវិមានអានីតកាបៀ (វិមានគោរពវិញ្ញាណក្ខន្ធ) ហើយនឹងជួបពិភាក្សាជាមួយសមាជិកគណៈកម្មាធិការកិច្ចការបរទេស និងមិត្តភាពនៃរដ្ឋសភាតួកគី។

ក្រសួងការបរទេសបញ្ជាក់ថា កម្ពុជានឹងបើកស្ថានឯកអគ្គរាជទូតនៅទីក្រុងអង់ការ៉ា ប្រទេសតួកគី ក្នុងឆ្នាំ២០១៩ ដែលនឹងដើរតួនាទីដ៏សំខាន់ក្នុងការជំរុញ កិច្ចសហប្រតិបត្តិការ និងភាពជាដៃគូកាន់តែជិតស្និទ្ធរវាងប្រទេសទាំងពីរ៕

អត្ថបទ៖ សោភា