រាជរដ្ឋាភិបាល អំពាវនាវកុំឱ្យមានការព្រួយបារម្ភ ជុំវិញនីតិវិធីដកការអនុគ្រោះពន្ធរបស់ EU

2018-10-12 12:04:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនាំពាក្យរាជរដ្ឋាភិបាលកម្ពុជា នៅថ្ងៃទី១២ ខែតុលា ឆ្នាំ២០១៨នេះ បានអំពាវនាវឱ្យប្រជាពលរដ្ឋ កុំមានការព្រួយបារម្ភតាមរយៈការវិភាគ និងការវាយតម្លៃមិនសមហេតុផល ស្តីពីពន្ធអនុគ្រោះ EBAs ដោយលើកឡើងថា ពន្ធអនុគ្រោះនេះ គឺមាននីតិវិធីក្នុងការអនុវត្ត ឬការដោះស្រាយ ដែលនឹងត្រូវចំណោយពេលវែងឆ្ងាយទៅមុខទៀត ក្នុងកិច្ចសហប្រតិបត្តិការ រវាងភាគីសហភាពអឺរ៉ុប និងកម្ពុជា។

យោងតាមសេចក្តីថ្លែងការណ៍ដែលបង្ហោះនៅលើទំព័រហ្វេសប៊ុករបស់លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា រៀបរាប់ថា សហភាពអឺរ៉ុបបានចេញសេចក្តីថ្លែងការណ៍ ទាក់ទងទៅនឹងកម្មវិធី ពន្ធអនុគ្រោះពាណិជ្ជកម្មសម្រាប់កម្ពុជា (អ្វីៗគ្រប់យ៉ាងលើកលែងតែសព្វាវុធ “EBAs”) គឺមិនបានធ្វើឱ្យកម្ពុជាមានការព្រួយបារម្ភហួសហេតុ ឬបង្កផលប៉ះពាល់ធ្ងន់ធ្ងរដល់សេដ្ឋកិច្ចនោះឡើយ។

លោក ផៃ ស៊ីផាន ថ្លែងនាពេលកន្លងមក

ការលើកឡើងនេះ ដោយយោងទៅតាមលក្ខខណ្ឌនៃកិច្ចព្រមព្រៀងរវាងកម្ពុជា និងសហភាពអឺរ៉ុប ចំពោះពន្ធអនុគ្រោះ EBAs គឺមានគោលការណ៍ និងទិសដៅ “សម្រាប់ផ្ដល់ឱ្យប្រទេសដែលមានការអភិវឌ្ឍតិចតួច (LDCs)” ដូចជាប្រទេសកម្ពុជា ហើយក៏ជាប្រទេស ដែលនាំមុខគេក្នុងការផ្តល់សច្ចាប័ន នៃកិច្ចព្រមព្រៀងជាមួយអង្គការពលកម្មអន្តរជាតិ (ILO) ដែលជាកត្តាចម្បងមួយ ក្នុងការទទួលបានពន្ធអនុគ្រោះពាណិជ្ជកម្ម EBAs នេះ។

លោក ផៃ ស៊ីផាន បានបញ្ជាក់ថា ដំណើរការនៃផលិតកម្មឧស្សាហកម្មវាយណភ័ណ្ឌនៅកម្ពុជា សម្រាប់នាំចេញទៅទីផ្សារអឺរ៉ុបនោះ មិនទាន់មានផលប៉ះពាល់អវិជ្ជមានណាមួយនោះទេ។ ពេលនេះ ភាគីពាក់ព័ន្ធកំពុងតែធ្វើការពិភាក្សា និងដោះស្រាយ ទៅតាមនីតិវិធី នៃកិច្ចព្រមព្រៀងរវាងកម្ពុជា និងសហភាពអឺរ៉ុប ស្ដីពីការអនុវត្តប្រព័ន្ធអនុគ្រោះពន្ធ (EBAs) នេះ ។

កម្ពុជា ក៏បាននឹងកំពុងបន្តកិច្ចសហប្រតិបត្តិការយ៉ាងល្អ និងជិតស្និទ្ធ ជាមួយសហភាពអឺរ៉ុប ទាំងផ្នែកពាណិជ្ជកម្ម សេដ្ឋកិច្ច និងផ្នែកផ្សេងៗទៀត ដើម្បីផលប្រយោជន៍រួមគ្នាទៅវិញទៅមក។ នៅក្នុងស្ថានភាពនេះ សហភាពអឺរ៉ុប និងកម្ពុជា នៅតែបន្តរក្សាភាពជាដៃគូ ក្នុងកិច្ចសន្ទនា ដើម្បីថែរក្សាផលប្រយោជន៍រួម ដែលកើតចេញពីពន្ធអនុគ្រោះ (EBAs) ជាមួយនឹងកិច្ចធានានូវអធិបតេយ្យ និងឯករាជ្យភាពរៀងៗខ្លួន។ នេះបើតាមការពន្យល់បន្ថែមរបស់អ្នកនាំពាក្យរាជរដ្ឋាភិបាល៕

អត្ថបទ៖ សំភី