សម្តេច ហ៊ុន សែន សម្រេចបន្តសហការស្វែងរកអដ្ឋិធាតុទាហានអាមេរិកឡើងវិញ ក្រោយផ្អាក១ឆ្នាំ
- 2018-10-14 01:40:20
- ចំនួនមតិ 0 | ចំនួនចែករំលែក 0
សម្តេច ហ៊ុន សែន សម្រេចបន្តសហការស្វែងរកអដ្ឋិធាតុទាហានអាមេរិកឡើងវិញ ក្រោយផ្អាក១ឆ្នាំ
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានយល់ព្រមបន្តប្រតិបត្តិការឡើងវិញនូវការស្វែងរកអដ្ឋិធាតុឈ្លើយសឹក និងទាហានអាមេរិក ដែលបានបាត់ខ្លួនក្នុងសម័យសង្គ្រាម នៅកម្ពុជា បើទោះបីជាអាមេរិក បានដាក់កម្រិតតឹងតែងទិដ្ឋាការមកលើមន្រ្តីកម្ពុជាក៏ដោយ។
សម្តេច ហ៊ុន សែន បានផ្ញើលិខិតបញ្ជាក់ពីការសម្រេចចិត្តនេះកាលពីថ្ងៃទី១២ ខែតុលា ឆ្នាំ២០១៨ ឆ្លើយតបទៅនឹងសំណើរបស់សមាជិកព្រឹទ្ធសភាអាមេរិក លោក Doug Ericksen និងលោកតំណាងរាស្រ្ត Vincent Buys នៅរដ្ឋវ៉ាស៊ីងតោន។
សម្តេច ហ៊ុន សែន បន្តថា កិច្ចសហប្រតិបត្តិការលើកម្មវិធីរុករកអដ្ឋិធាតុឈ្លើយសឹក និងទាហានអាមេរិកនេះ ធ្វើឡើងតាំងតែពីមុនពេលកម្ពុជា និងអាមេរិក តភ្ជាប់ទំនាក់ទំនងឡើងវិញនៅទសវត្សឆ្នាំ១៩៩០ ដែលបញ្ជាក់ពីការខិតខំរបស់កម្ពុជាដើម្បីគោលដៅនេះ ហើយក៏ជាការឆ្លុះបញ្ចាំងនូវការរួមមនោសញ្ចេតនាយ៉ាងជ្រាលជ្រៅជាមួយនឹងក្រុមគ្រួសារឈ្លើយសឹក និងទាហានអាមេរិកបាត់ខ្លួន។
គួររំលឹកថា កាលពីពាក់កណ្តាលខែកញ្ញា ឆ្នាំ២០១៧ ប្រមុខរាជរដ្ឋាភិបាលកម្ពុជា បានប្រកាសផ្អាកប្រតិបត្តិការស្វែងរកអដ្ឋិធាតុទាហានអាមេរិក នៅកម្ពុជា ដើម្បីឆ្លើយតបទៅនឹងរដ្ឋាភិបាលអាមេរិក ដែលសម្រេចផ្អាកលែងផ្តល់ទិដ្ឋាការដល់មន្រ្តីក្រសួងការបរទេសកម្ពុជា មានតួនាទីចាប់ពីថ្នាក់អគ្គនាយក រហូតដល់ថ្នាក់ដឹកនាំកំពូល និងសមាជិកក្រុមគ្រួសាររបស់ពួកគេ ដោយមានករណីលើកលែងតិចតួចប៉ុណ្ណោះ។ ការផ្អាកនេះ ក្រោមហេតុផលថា កម្ពុជា មានការយឺតយ៉ាវក្នុងការទទួលយកជនជាតិខ្លួន ដែលជាប់ទោសឧក្រិដ្ឋ នៅអាមេរិក ឲ្យមករស់នៅលើទឹកដីកម្ពុជាវិញ៕