សមយុទ្ធសង្គ្រោះយន្តហោះជួបឧបទ្ទវហេតុ គ្រោងធ្វើនៅខេត្តព្រះសីហនុ

2018-10-16 09:40:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋលេខាធិការដ្ឋានអាកាសចរណ៍ស៊ីវិល នឹងសហការជាមួយអាជ្ញាធរខេត្តព្រះសីហនុ រៀបចំធ្វើ លំហាត់សមយុទ្ធទ្រង់ទ្រាយធំលើកទី២ ដើម្បីសង្រ្គោះយន្តហោះពេលជួបឧបទ្ទវហេតុ នៅព្រលានយន្តហោះអន្តរជាតិខេត្តព្រះសីហនុ (កងកេង) នៅដើមខែវិច្ឆិកា ឆ្នាំ២០១៨ខាងមុខនេះ។ នេះបើតាមការបង្ហោះលើគណនីផ្លូវការរបស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ កាលពីថ្ងៃទី១៤តុលា។

ការរៀបចំលំហាត់សមយុទ្ធទ្រង់ទ្រាយធំលើកទី២ ដើម្បីសង្រ្គោះយន្តហោះពេលជួបឧបទ្ទវហេតុ នៅព្រលានយន្តហោះអន្តរជាតិខេត្តព្រះសីហនុ

លោក ខៀវ កាញារីទ្ធ បានឲ្យដឹងថា ការរៀបចំធ្វើសមយុទ្ធជាទ្រង់ទ្រាយធំនេះ ខាងអាកាសចរណ៍ស៊ីវិលស្នើឲ្យគ្រប់ស្ថាប័ន អង្គភាពជំនាញនៅទូទាំងខេត្តព្រះសីហនុ ចូលរួមសហការឲ្យបានស្រុះដៃគ្នា ដើម្បីចូលរួមសង្រ្គោះក្នុងករណីកើតមានឧបទ្ទវហេតុយន្តហោះកើតឡើងជាយថាហេតុណាមួយ។

លោកបន្តថា នៅថ្ងៃកំណត់មកដល់ គ្រប់អង្គភាពសង្រ្គោះដែលមានមូលដ្ឋាននៅក្នុងខេត្តព្រះសីហនុត្រូវចាប់ផ្តើមចេញប្រតិបត្តិការព្រមៗគ្នាពីគ្រប់ច្រកល្ហក ឆ្ពោះទៅកាន់គោលដៅកើតឧបទ្ទវហេតុដែលមានសកម្មភាពដូចជា៖

ការចេញប្រតិបត្តិការសម្រួលចរាចរណ៍របស់កម្លាំងនគរបាល
ការចេញដំណើររបស់រថយន្តពន្លត់អគ្គិភ័យ ដោយមានបន្លឺស៊ីរ៉ែនពីគ្រប់អង្គភាព (ដូចជាក់ស្តែង)
ការចេញដំណើររបស់រថយន្តពេទ្យសង្គ្រោះមានបន្លឺសំឡេងស៊ីរ៉ែនពីគ្រប់មន្ទីរពេទ្យរដ្ឋ គ្លីនិកឯកជន មណ្ឌលសុខភាព និងពីគ្រប់ទីបញ្ជាការកងកម្លាំងប្រដាប់អាវុធដែលមានទីតាំងនៅជិតកន្លែងកើតហេតុ
ការចេញដំណើររបស់រថយន្តកងទ័ពដឹកជញ្ជូនកម្លាំងសង្រ្គោះ (កងទ័ពជើងទឹក កងរាជអាវុធហត្ថ កងទ័ពតំបន់សឹកខេត្ត កងកម្លាំងនគរបាលខេត្ត)
សកម្មភាពដឹកជញ្ជូនជនរងគ្រោះ (សិប្បនិម្មិត) ទៅកាន់គោលដៅសង្រ្គោះ ជាដើម។

លោករដ្ឋមន្ត្រី បានអំពាវនាវដល់អ្នកធ្វើចរាចរណ៍លើដងផ្លូវនានា ជួយសម្រួលបើកផ្លូវឲ្យក្រុមការងារអនុវត្តបានលទ្ធផលល្អ និងជៀសវាងនូវករណីគ្រោះថ្នាក់ពិត ដែលកើតចេញពីសកម្មភាពធ្វើលំហាត់ប្រឌិតនេះ ជាពិសេសស្នើដល់មហាជនទាំងអស់ កុំមានការយល់ច្រឡំ ហើយផ្សព្វផ្សាយថាជាហេតុការណ៍ពិតឲ្យសោះ៕

រូបថត៖ គណនីហ្វេសប៊ុកផ្លូវការរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន

អត្ថបទ៖ លាភ.