សម្តេច ហ៊ុន សែន ជួបពិភាក្សាទ្វេភាគីជាមួយនាយករដ្ឋមន្រ្តីរុស្ស៊ី

2018-10-19 01:35:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានជួបពិភាក្សាទ្វេភាគីជាមួយនាយករដ្ឋមន្រ្តីរុស្ស៊ី លោក Dmitry Medvedev កាលពីថ្ងៃទី១៨ ខែតុលា ឆ្នាំ២០១៨ ក្នុងអំឡុងថ្នាក់ដឹកនាំទាំង២ ចូលរួមកិច្ចប្រជុំកំពូលអាស៊ី-អឺរ៉ុប នៅក្រុងប្រ៊ុចសែល ប្រទេសបែលហ្សិក។

ក្នុងជំនួបពិភាក្សានេះ សម្តេច ហ៊ុន សែន បានអញ្ជើញភាគីរុស្ស៊ី ឱ្យចូលរួមក្នុងកិច្ចប្រជុំកំពូលអាស៊ី-អឺរ៉ុប នៅឆ្នាំ២០២០ខាងមុខ ដែលកម្ពុជាធ្វើជាម្ចាស់ផ្ទះ។

សម្តេច ហ៊ុន សែន ក្នុងជំនួបជាមួយលោក Dmitry Medvedev នៅបែលហ្សិក កាលពីថ្ងៃទី១៨តុលា ២០១៨។ រូបថត៖ FB សម្តេច ហ៊ុន សែន

សម្តេចនាយករដ្ឋមន្រ្តី បានស្នើឲ្យមានការពង្រឹងថែមទៀត លើកិច្ចសហប្រតិបត្តិការលើការប្រយុទ្ធប្រឆាំងអំពើភេរវកម្ម ពិសេសការបង្កើនកិច្ចសហប្រតិបត្តិការ និងការគាំទ្រពីរុស្ស៊ី លើវិស័យព័ត៌មាន ពិសេសកិច្ចសហប្រតិបត្តិការរវាង ទីភ្នាក់ងារសារព័ត៌មានកម្ពុជា ជាមួយនឹងទីភ្នាក់ងារសារព័ត៌មានTass របស់រុស្សី ដែលគ្រោងបើកនៅប្រទេសកម្ពុជា នាពេលខាងមុខ។

ក្នុងជំនួបទ្វេភាគីនោះដែរ សម្តេច ហ៊ុន សែន បានមានប្រសាសន៍លើកឡើងពីបំណុលដែលកម្ពុជា ជំពាក់អតីតសហភាពសូវៀត ពោលគឺកម្ពុជាចង់បង្វែបំណុលនោះ ទៅជាការវិនិយោគនៅកម្ពុជា។ ជាមួយគ្នានេះ សម្តេចក៏បានអរគុណចំពោះរុស្ស៊ី ដែលបានសន្យាជួយដល់ការធ្វើទំនើបកម្មមន្ទីរពេទ្យមិត្តភាពខ្មែរសូវៀតផងដែរ។

ជាការឆ្លើយតប លោកនាយករដ្ឋមន្រ្តីរុស្ស៊ី បានមានប្រសាសន៍ថា រុស្សីនឹងបន្តសហការជាមួយកម្ពុជា លើវិស័យជាច្រើន រួមទាំងវិស័យសន្តិសុខ សេដ្ឋកិច្ច ពាណិជ្ជកម្ម វិនិយោគ ដើម្បីឲ្យទំនាក់ទំនងនៃប្រទេសទាំងពីរកាន់តែរឹងមាំទ្វេឡើងថែមទៀត។ លោកបន្តថា ចាប់ពីឆ្នាំ២០១៩ទៅ រុស្ស៊ីនឹងផ្តល់ជំនួយមួយចំនួនដល់ប្រទេសកម្ពុជា។

ពាក់ព័ន្ធទៅនឹងបំណុលដែលកម្ពុជាជំពាក់នោះ លោក Dmitry Medvedev បញ្ជាក់ថា រុស្ស៊ីនឹងប្រើប្រាស់បំណុលនោះ សម្រាប់ជាការវិនិយោគនៅកម្ពុជា ដែលនោះគឺជាអាទិភាពដ៏ល្អសម្រាប់កម្ពុជា ដែលរុស្ស៊ីចង់ជួយ។

លោកក៏បានជម្រាបជូនសម្តេច ពីការផ្តល់ជំនួយបច្ចេកទេសមួយចំនួនផងដែរ ក្រៅពីការជួយដល់ការជួសជុលមន្ទីរពេទ្យមិត្តភាពខ្មែរសូវៀត ពោលគឺរុស្ស៊ី មានបំណងជួយដល់ការជួសជុលប្រាសាទបុរាណមួយចំនួនរបស់កម្ពុជា ដោយសារតែមានអ្នកទេសចររុស្ស៊ីជាច្រើន បានទៅទស្សនា និងចាប់អារម្មណ៍យ៉ាងខ្លាំងពីប្រទេសកម្ពុជា៕

អត្ថបទ៖ សំភី