សម្តេច ហ៊ុន សែន៖ បើ EU ដកការអនុគ្រោះពន្ធ គឺហាក់បោះបង់ចោលនូវអ្វីៗដែលខ្លួនខំធ្វើកន្លងមក

2018-10-19 02:13:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានបញ្ជាក់ថា កន្លងមក សហភាពអឺរ៉ុប (EU) បានជួយដល់កម្ពុជាយ៉ាងច្រើន ព្រោះចង់ឃើញកម្ពុជារីកចម្រើន។ ប៉ុន្តែប្រសិនជា EU សម្រេចដកចេញប្រព័ន្ធអនុគ្រោះពន្ធ EBA គឺហាក់បីដូចជា EU បោះបង់ចោលនូវអ្វីៗដែលខ្លួនបានខិតខំធ្វើកន្លងមកនៅកម្ពុជា។ ការថ្លែងនេះ ធ្វើឡើងក្នុងពេលដែលសម្តេចអញ្ជើញជួបតំណាងក្រុមប្រឹក្សាធុរកិច្ចអាស៊ាន-សហភាពអឺរ៉ុប នៅក្រុងប៊្រុចសែល ប្រទេសបែលហ្សិក កាលពីថ្ងៃទី១៨តុលា ២០១៨។

សម្តេចនាយករដ្ឋមន្រ្តី មានប្រសាសន៍សង្កត់ធ្ងន់ថា សម្តេចមិនចង់ឃើញប្រទេសប្រជាធិបតេយ្យមួយចំនួនដែលបានប្រព្រឹត្តនូវកំហុស ២លើករួចមកហើយ បន្តប្រព្រឹត្តកំហុសជាលើកទី៣ មកលើកម្ពុជាទៀតឡើយ។

-កំហុសលើកទី១ គឺកាលពីអតីតកាលក្នុងទសវត្សរ៍ឆ្នាំ១៩៧០ ដែលមានប្រទេសប្រជាធិបតេយ្យមួយចំនួននៅអឺរ៉ុប បានគាំទ្ររដ្ឋប្រហារយោធានៅក្នុងប្រទេសកម្ពុជា ដែលបាននាំមកនូវសង្រ្គាមវិនាសកម្ម និងការបំផ្លិចបំផ្លាញដល់កម្ពុជា។

-កំហុសទី២ គឺប្រទេសប្រជាធិបតេយ្យមួយចំនួននោះបានគាំទ្ររបបខ្មែរ ក្រហមជាង ១ទសវត្សរ៍ រួមទាំងការពារកៅអីខ្មែរក្រហម នៅអង្គការសហប្រជាជាតិ (UN) ដែលរបបនេះ បានសម្លាប់មនុស្សអស់ជាង ៣លាននាក់។

សម្តេចថា ប្រទេសប្រជាធិបតេយ្យទាំងនោះ គឺពួកគេមិនមានអ្វីសោកស្តាយចំពោះការបាត់បង់របស់កម្ពុជា នាពេលកន្លងមកឡើយ។

ជាមួយនឹងកំហុសខាងលើនេះ សម្តេច ហ៊ុន សែន បានស្នើកុំឱ្យមានកំហុសទី៣ កើតឡើងចំពោះកម្ពុជា ជាបន្តទៀត ព្រោះមិនមែនប្រទេសទាំងនោះជាអ្នកដែលត្រូវទទួលរងនូវភាពខ្លោចផ្សាទាំងនោះទេ គឺពលរដ្ឋកម្ពុជា ជាអ្នកដែលត្រូវទទួលរងនូវការឈឺចាប់ និងវិនាសហិនហោច។

សម្តេច ហ៊ុន សែន ក្នុងពេលជួបតំណាងក្រុមប្រឹក្សាធុរកិច្ចអាស៊ាន-សហភាពអឺរ៉ុប នៅក្រុងប៊្រុចសែល ប្រទេសបែលហ្សិក កាលពីថ្ងៃទី១៨តុលា ២០១៨។ រូបថត៖ FB សម្តេច ហ៊ុន សែន

សម្តេច ហ៊ុន សែន បានបញ្ជាក់ជូននៅមុខពាណិជ្ជករ វិនិយោគគិន និងមន្រ្តីសំខាន់ៗមកពី ក្រុមប្រឹក្សាធុរកិច្ចអាស៊ានសហភាពអឺរ៉ុបថា ទោះបីសហភាពអឺរ៉ុប មានបំណងដាក់ទណ្ឌកម្មដក EBA ពីកម្ពុជាយ៉ាងណាក្តី ក៏កម្ពុជាមិនសងសឹក ទៅលើក្រុមហ៊ុនមកពីសហគមន៍អឺរ៉ុប ឬមកពីបណ្តាប្រទេសដទៃ ឱ្យមានការពិបាក ឬទទួលការខាតបង់ដោយសារការសម្រេចចិត្ត មិនត្រឹមត្រូវរបស់សហភាពអឺរ៉ុបដែរ។ សម្តេច បានធានាការពារផលប្រយោជន៍ ហើយអញ្ជើញក្រុមហ៊ុនអឺរ៉ុប ឱ្យមកវិនិយោគនៅកម្ពុជាកាន់តែច្រើនឡើងថែមទៀត។

បើតាមលោកអនុប្រធានក្រុមប្រឹក្សាធុរកិច្ចអាស៊ានសហភាពអឺរ៉ុប ដែលមានក្រុមហ៊ុនអឺរ៉ុបប្រមាណ ៤០០ក្រុមហ៊ុន បានចាត់ទុកថា ប្រសិនជាមានការដកចេញនូវពន្ធអនុគ្រោះ EBA ពីកម្ពុជាមែននោះ វានឹងធ្វើឲ្យប៉ះពាល់ដល់បណ្តាក្រុមហ៊ុនធុរកិច្ចមកពី EU។ តាមរយៈរបាយការណ៍នេះ តំណាងធុរកិច្ចអឺរ៉ុប-អាស៊ាន នឹងជួបពិភាក្សាដោយផ្ទាល់ជាមួយតំណាងក្រុមប្រឹក្សាអឺរ៉ុបលើបញ្ហានេះ ព្រោះវានឹងធ្វើឱ្យប៉ះពាល់ខាតបង់នូវផលប្រយោជន៍ក្រុមហ៊ុនអឺរ៉ុបជាច្រើនដែលកំពុងវិនិយោគនៅកម្ពុជា។

យោងតាមទំព័រហ្វេសប៊ុកសម្តេច ហ៊ុន សែន ឱ្យដឹងថា ក្នុងករណីដែលសហភាពអឺរ៉ុបសម្រេចជាផ្លូវការដក EBA ពីកម្ពុជា គឺទីផ្សារអឺរ៉ុប នៅតែបើកចំហរសម្រាប់កម្ពុជាដដែល។ ប៉ុន្តែគ្រាន់តែមានការបន្ថែមតម្លៃពន្ធដារមួយចំនួនប៉ុណ្ណោះ។ កម្ពុជាត្រូវតែខិតខំកសាងអភិវឌ្ឍខ្លួនឱ្យរួចផុតពីភាពក្រីក្រ ដើម្បីមានកម្លាំងសេដ្ឋកិច្ចរឹងមាំ នៅពេលនោះហើយ EBA ក៏នឹងត្រូវដកចេញជាស្វ័យប្រវត្តិ។ ការផ្តល់នូវប្រព័ន្ធអនុគ្រោះពាណិជ្ជកម្ម (EBA) គឺសម្រាប់ប្រទេសក្រីក្រ ក្នុងការនាំយកផលិតផល និងទំនិញនានា មកកាន់ទីផ្សារ EU ដោយមានការអនុគ្រោះពន្ធ ហើយមិនអាចផ្តល់ជូនជារៀងរហូតនោះបានឡើយ៕

អត្ថបទ៖ សំភី