អតីតតំណាងរាស្រ្ត CNRP លោក ជាម ច័ន្ទនី ទទួលមរណភាព ក្រោយធ្លាក់ខ្លួនឈឺធ្ងន់ ៣ខែ

2018-10-26 02:58:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតតំណាងរាស្ត្រគណបក្សសង្គ្រោះជាតិលោក ជាម ច័ន្ទនី បានទទួលមរណភាពនៅគេហដ្ឋានរបស់លោក នៅរាជធានីភ្នំពេញ កាលពីរសៀលថ្ងៃទី២៥ តុលា ដោយជំងឺមហារីកខួរក្បាល។

ប្អូនស្រីនៃសព គឺអ្នកស្រី ជាម សំណាង ថ្លែងថា លោក ជាម ច័ន្ទនី បានធ្លាក់ខ្លួនឈឺធ្ងន់ប្រមាណ៣ខែ និងបានបញ្ជូនទៅព្យាបាលជំងឺនៅមន្ទីរពេទ្យប៉ាឡូ ក្នុងទីក្រុងបាងកក ប្រទេសថៃ ប្រហែល១ខែកន្លះ។ ប៉ុន្តែស្ថានភាពជំងឺកាន់តែដុនដាប រហូតគ្រូពេទ្យឲ្យសាច់ញាតិបញ្ជូនលោកត្រឡប់ទៅសម្រាកនៅផ្ទះបាន២០ថ្ងៃក៏ទទួលអនិច្ចកម្ម។

អ្នកស្រីលើកឡើងយ៉ាងដូច្នេះថា៖ «ដុះសាច់ក្នុងខួរក្បាលនិងនិងរោគសួត ប៉ុន្តែមិនទាន់បានព្យាបាលទេ ដោយសារគាត់ដួលកកឈាមក្នុងខួរក្បាល ហើយដុះសាច់ទៀតដល់ពេលហើយក៏ជំងឺបានឆ្លងទៅខួរក្បាលទៀត តែដល់ហើយក៏កកឈាមម្ដងហើយធ្វើការវះកាត់ម្ដងទៀត។ យើងមើលជាហើយតែយើងមើលសួតអត់ទាន់ក៏បែកឈាមកាន់តែធ្ងន់តែម្ដង»។

លោក ជាម ច័ន្ទនី ថ្លែងក្នុងវេទិការបស់ CNRP កាលពីខែមិថុនា ឆ្នាំ២០១៦។ រូបថត៖ វិបសាយ CNRP7

បច្ចុប្បន្នសាកសពត្រូវបានសាច់ញាតិតម្កល់ធ្វើបុណ្យចំនួន ៣ថ្ងៃ នៅគេហដ្ឋាននៃសពនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីនៅភ្នំពេញ។

សូមជម្រាបថា បើតាមការបង្ហោះនៅលើទំព័រហ្វេសប៊ុករបស់លោក មាជ សុវណ្ណារ៉ា អតីតមន្រ្តីជាន់ខ្ពស់នៃអតីតបក្សប្រឆាំង បានបង្ហាញត្រួសៗអំពីអតីតភាពការងាររបស់លោក ជាម ច័ន្ទនី រួមមាន៖

-លោក ជាម ច័ន្ទនី ជាអតីតអ្នកតំណាងរាស្រ្តរបស់បក្សប្រឆាំងចំនួន ៤អាណតិ្តមកហើយតាំងពីឆ្នាំ១៩៩៨ រហូតដល់ឆ្នាំ២០១៧។

– លោកជាអតីតអ្នកទោសនយោបាយជិត២ឆ្នាំ ក្នុងអំឡុងដើមទសវត្សរ៍ឆ្នាំ២០០០។

-នាយទាហានជើងគោកនៅស្រុកថ្មពួក ខេត្តបន្ទាយមានជ័យ និងជើងអាកាសក្នុងកងពលពិសេសកងទ័ពឆ័ត្រយោង៩១១ រហូតដល់ឆ្នាំ១៩៩៦។

-អតីតនិស្សិតសិក្សានៅជំរំជាយដែន និងជាអតីតនាយទាហានតស៊ូនៃចលនារណសិរ្សជាតិ រំដោះប្រជាពលរដ្ឋខ្មែរ គឺចលនាកងទ័ពជាតិរំដោះប្រជាពលរដ្ឋខ្មែរដឹកនាំដោយលោកតា សឺន សាន និងលោកសក់ ស៊ុតសាខន ក្នុងទសវត្សឆ្នាំ៨០&៩០៕