ផ្លូវបំបែកស្រែអំបិល-កោះកុង គ្រោងបញ្ចប់ការជួសជុលបឋម នៅខែធ្នូ ឆ្នាំ២០១៨

2018-11-13 09:20:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងការចុះត្រួតពិនិត្យស្ថានភាពការដ្ឋានជួសជុលថែទាំផ្លូវជាតិលេខ៤៨ នៅថ្ងៃទី១៣ខែវិច្ឆិកានេះ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹងថា ផ្លូវជាតិលេខ៤៨ (ផ្លូវបំបែកស្រែអំបិល-ទីរួមខេត្តកោះកុង) គ្រោងនឹងបញ្ចប់ការជួសជុលបឋមនៅពាក់កណ្ដាលខែធ្នូ ឆ្នាំ២០១៨ មុនពិធីបុណ្យសមុទ្រ។

លោកទេសរដ្ឋមន្ត្រី ស៊ុន ចាន់ ថុល រដ្ឋមន្ត្រីក្រសួងសាធារណការ និងដឹកជញ្ជូន ដឹកនាំមន្ត្រីចុះត្រួតពិនិត្យ ស្ថានភាពការដ្ឋានជួសជុលថែទាំផ្លូវជាតិលេខ៤៨ នៅថ្ងៃទី១៣ខែវិច្ឆិកានេះ

ផ្លូវនេះ មានប្រវែង ១៥០គីឡូម៉ែត្រ ចាប់ពីផ្លូវបំបែកស្រែអំបិលទៅដល់ទីរួមខេត្តកោះកុង។ ក្នុងចម្ងាយផ្លូវ ១៥០គីឡូម៉ែត្រនេះ ផ្លូវប្រវែង ៦៣គីឡូម៉ែត្រ ត្រូវទទួលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កម្រិតកំណត់ និងកត្តាធម្មជាតិផ្សេងៗទៀត។

លោកទេសរដ្ឋមន្ត្រី បានគូសបញ្ជាក់ថា កំណាត់ផ្លូវដែលរងការខូចខាតប្រវែង ៦៣ គីឡូម៉ែត្រនេះ ត្រូវបានចែកចេញជា ៩១កំណាត់ដើម្បីជួសជុលដោយអង្គភាពធំៗចំនួន៣ រួមមាន៖ នាយកដ្ឋានគ្រឿងចក្រ និងស្ថាបនាផ្លូវ នាយកដ្ឋានជួសជុលនិងថែទាំផ្លូវថ្នល់ និងនាយកដ្ឋានវិស្វកម្មនៃក្រសួងការពារជាតិ។ ការជួសជុល បានប្រើប្រាស់គ្រឿងចក្រសម្រាប់ជួសជុលប្រមាណ ៤០០គ្រឿង និងប្រើប្រាស់ថវិកាជាតិសរុបប្រមាណ ១២លានដុល្លារអាមេរិកសម្រាប់ធានាការជួសជុល និងថែទាំផ្លូវនេះ រហូតដល់ការចាប់ផ្ដើមអនុវត្តគម្រោង ស្តារ និងធ្វើឲ្យប្រសើរឡើង ក្រោមឥណទានប្រាក់កម្ចីរបស់សាធារណរដ្ឋកូរ៉េ (EDCF)។

លោកទេសរដ្ឋមន្ត្រី បានអំពាវនាវឲ្យប្រជាពលរដ្ឋ ក៏ដូចជាក្រុមហ៊ុនដឹកជញ្ជូន ចូល រួមថែរក្សាក្នុងស្មារតីភាពជាម្ចាស់ការ ដើម្បីកាត់បន្ថយការចំណាយរបស់រដ្ឋ និងបានក្រើនរំលឹកដល់ មន្ត្រីតាមស្ថានីយជញ្ជីងទាំងអស់ត្រូវគោរព និងអនុវត្តតាមច្បាប់ឲ្យបានតឹងរ៉ឹងបំផុត ជៀសវាងការប្រព្រឹត្ត អំពើខុសប្រក្រតី។

សូមជម្រាបថា ខេត្តកោះកុង នឹងធ្វើជាម្ចាស់ផ្ទះរៀបចំពិធីបុណ្យសមុទ្រលើកទី៧ ជុំទី២ ដែលប្រារព្ធ ចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០១៨ ខាងមុខនេះ។ នៅក្នុងពិធីនោះដែរ សម្តេច ហ៊ុន សែន នាយករដ្ឋមន្ត្រី និងសម្តេច ប៊ុន រ៉ានី ហ៊ុន សែន នឹងអញ្ជើញជាអធិបតីភាពក្នុងពិធីបើកជាផ្លូវការ៕