នាយករដ្ឋមន្ត្រីស្តីទី៖ កម្ពុជាប្រឆាំងរាល់ទង្វើនៃការរើសអើងសាសនា

2018-12-06 03:32:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង នាយករដ្ឋមន្ត្រីស្តីទី បានថ្លែងបញ្ជាក់ថា រាជរដ្ឋាភិបាលកម្ពុជាប្រឆាំងរាល់ទង្វើនៃការរើសអើង ការបែងចែកក្នុងចំណោមប្រជាពលរដ្ឋ ដែលបណ្តាលមកពីភាពខុសគ្នានៃជំនឿសាសនានីមួយៗ សំដៅទប់ស្កាត់រាល់ការយកសាសនាធ្វើជាឧបករណ៍ ឬធ្វើអាជីវកម្ម ដែលអាចបង្កជាវិបត្តិ ឬចលាចលសង្គម។

សម្ដេច ស ខេង ចូលរួមក្នុងពិធីបើកអង្គសិក្ខាសាលាស្តីពីកិច្ចសន្ទនាអន្តរជំនឿសាសនាដើម្បីពង្រឹងសុខដុមនីយកម្មសាសនានៅព្រះរាជាណាចក្រកម្ពុជា លើកទី៧

ការថ្លែងបញ្ជាក់នេះ ធ្វើឡើងនៅក្នុងពិធីបើកអង្គសិក្ខាសាលាស្តីពីកិច្ចសន្ទនាអន្តរជំនឿសាសនាដើម្បីពង្រឹងសុខដុមនីយកម្មសាសនានៅព្រះរាជាណាចក្រកម្ពុជា លើកទី៧ ក្រោមប្រធានបទ "សាសនិកគ្មានគ្រឿងញៀន និងការគោរពច្បាប់ចរាចរណ៍ផ្លូវគោក" នៅព្រឹកថ្ងៃទី០៦ ខែធ្នូ ឆ្នាំ២០១៨ នេះ នៅសាលសន្និសីទចតុមុខ។

សម្តេច ស ខេង បានមាន ប្រសាសន៍ថា ការរៀបចំសិក្ខាសាលានេះឡើង ជាការផ្តល់កិត្តិយស និងកិត្យានុភាព នៃសុខដុមនីយកម្មសាសនានៅកម្ពុជា ក៏ដូចជាការបង្ហាញយកចិត្តទុកដាក់របស់រាជរដ្ឋាភិបាលចំពោះសេរីភាព នៃជំនឿសាសនារបស់ប្រជាពលរដ្ឋលើឆាកជាតិ និងអន្តរជាតិ។ ជាពិសេសការអនុវត្តនូវគោលនយោបាយការបង្រួបបង្រួមជាតិ ដែលធ្វើអោយសាសនិកនៃសាសនានិមួយៗនៅកម្ពុជា កាន់តែខិតជិតចូលគ្នា រវាងគន្លាតទាំងឡាយដែលមាននៅក្នុងផ្ទៃក្នុងនៃការប្រតិបត្តិ តាមឱវាទជំនឿសាសនានិមួយៗ និងកាន់តែបានផ្សាភ្ជាប់គ្នាជាមួយនឹងការគោរពដើរតាមមាគ៌ា នៃគោលនយោបាយរបស់រាជរដ្ឋាភិបាលកម្ពុជាផងដែរ។

សម្តេចក្រឡាហោមបានបញ្ជាក់ថា "ស្ថិតក្នុងបរិបទនេះដែរ រាជរដ្ឋាភិបាលក៏បានយកចិត្តទុកដាក់ផ្តល់សិទ្ធិសេរីភាពយ៉ាងទូលំទូលាយ និងពេញលេញជូនប្រជាពលលរដ្ឋទូទៅ ក្នុងការគោរពប្រណិប័តន៍នូវគោលជំនឿសាសនារបស់ខ្លួននិមួយៗ ដោយឈរលើស្មារតី នៃការពង្រឹង និងពង្រីកសុខដុមនីយកម្មសាសនារវាងសានិកនៃគ្រប់និកាយសាសនាផ្សេងៗ ដោយប្រឆាំងរាល់ទង្វើនៃការរើសអើង ការបែងចែកក្នុងចំណោមប្រជាពលរដ្ឋ ដែលបណ្តាលមកពីភាពខុសគ្នានៃជំនឿសាសនានិមួយៗ សំដៅទប់ស្កាត់រាល់ការយកសាសនាធ្វើជាឧបករណ៍ ឬធ្វើអាជីវកម្ម ដែលអាចបង្កជាវិបត្តិ ឬចលាចលសង្គម និងជម្រុញប្រែក្លាយសក្ដានុពលរបស់សាសនានិមួយៗ អោយទៅជាកម្លាំងចលករដ៏មានប្រសិទ្ធភាពក្នុងការជម្រុញការអភិវឌ្ឍសេដ្ឋកិច្ច សង្គម ព្រមទាំងពង្រឹងសុខសន្តិភាព សាមគ្គីភាព ថែរក្សាប្រពៃណីជាតិ និងលើកកម្ពស់តម្លៃសីលធម៌សាសនាក្នុងសង្គមជាតិ"៕

អត្ថបទ៖ សោភា