រដ្ឋសភា ប្រជុំអនុម័តបើកផ្លូវឲ្យអតីតមន្ត្រី CNRP មានសិទ្ធិធ្វើនយោបាយវិញ នៅថ្ងៃ១៣ ខែធ្នូ

2018-12-11 03:09:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី១៣ ខែធ្នូ ខាងមុខនេះ រដ្ឋសភានឹងប្រជុំវិសាមញ្ញ ដើម្បីពិភាក្សាអនុម័ត្តសេចក្តីស្នើច្បាប់ស្តីពីវិសោជនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយតាមសំណើរបស់តំណាងរាស្ត្រហត្ថលេខីចំនួន ៨៧រូប របស់គណបក្សប្រជាជនកម្ពុជា និងសេចក្តីព្រាងច្បាប់ស្តីពីបរធនបាលកិច្ច។

ការកំណត់ថ្ងៃប្រជុំវិសាមញ្ញរដ្ឋសភានេះ គឺបន្ទាប់ពីគណៈកម្មាធិការអចិន្ត្រៃយ៍បានប្រជុំសម្រេចនៅព្រឹកថ្ងៃទី១១ ខែធ្នូ ឆ្នាំ២០១៨នេះ។

គណៈកម្មាធិការអចិន្ត្រៃយ៍រដ្ឋសភា បើកកិច្ចប្រជុំនៅថ្ងៃទី១១ ខែធ្នូ ឆ្នាំ២០១៨នេះ

តំណាងរាស្ត្រហត្ថលេខីចំនួន ៨៧រូប របស់គណបក្សប្រជាជនកម្ពុជា បានផ្តួចផ្តើមធ្វើសេចក្តីស្នើច្បាប់ស្តីពីវិសោជនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយកាលពីថ្ងៃទី៣ ខែធ្នូ ឆ្នាំ២០១៨។ សេចក្តីស្នើច្បាប់ស្តីពីវិសោជនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយនេះ ជាការបន្ថែមនូវវាក្យខណ្ឌមួយថ្មីក្នុងមាត្រា ៤៥ថ្មី (ស្ទួនមួយ) គឺ “បុគ្គលដែលត្រូវបានតុលាការសម្រេចហាមឃាត់ការធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការសម្រេចហាមឃាត់ធ្វើសកម្មភាពនយោបាយនេះ នឹងអាចទទួលបាននូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយកករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ”។

គួរបញ្ជាក់ថា ច្បាប់ស្តីពីគណបក្សនយោបាយត្រូវបានរដ្ឋសភាពិភាក្សា និងអនុម័តដំបូង នៅថ្ងៃទី១៨ ខែវិច្ឆិកា ឆ្នាំ១៩៩៧ ដោយច្បាប់នេះដំបូងមានតែ ៤៥មាត្រា និងបានធ្វើវិសោធនកម្មចំនួនពីរដង គឺវិសោធនកម្មលើកទី១ នៅថ្ងៃទី០៧ ខែមីនា ឆ្នាំ២០១៧ និងវិសោធនកម្មលើកទី២ នៅថ្ងៃទី២៧ ខែកក្កដា ឆ្នាំ២០១៧ ។

ការធ្វើវិសោធនកម្មច្បាប់នេះ នាពេលនោះ គឺជាការចាំបាច់ ដោយមានការគិតគូរជជែកគ្នាអំពីតំណាងរាស្ត្រ ឬសមាជិកព្រឹទ្ធសភា ជាដើម ដើម្បីធ្វើយ៉ាងណាឲ្យវិសោធនកម្មនេះ សម្រាប់គល់ថ្វាយព្រះមហាក្សត្រ និងការទទួលខុសត្រូវរបស់គណបក្សនយោបាយនៅកម្ពុជា ស្របតាមសភាពការណ៍វិវត្តជាក់ស្តែងរបស់សង្គមកម្ពុជាក្នុងការអនុវត្តគោលការណ៍លទ្ធិប្រជាធិបតេយ្យ សេរីពហុបក្ស ពង្រឹងសន្តិសុខ ឯករាជ្យ អធិបតេយ្យភាព។

ចំណែកការធ្វើវិសោធនកម្មច្បាប់នេះ ជាលើកទី៣ គឺដើម្បីធានាភាពច្បាស់លាស់របស់បុគ្គល ដែលត្រូវបានតុលាការកំពូលសម្រេចហាមឃាត់ ការធ្វើសកម្មភាពនយោបាយ និងប្រសិទ្ធភាពនៃការអនុវត្តច្បាប់ដែលនៅជាធរមាន ដើម្បីលើកកម្ពស់ស្មារតីបង្រួបបង្រួមជាតិ និងពង្រឹងលទ្ធិប្រជាធិបតេយ្យ សេរីពហុបក្សនៅកម្ពុជា៕

អត្ថបទ៖ សោភា