រង្វង់មូលស្រអែម នឹងត្រូវកសាងដោយដាក់រូបសំណាកគោបុរ:ទី៥ នៃប្រាសាទព្រះវិហារ

2018-12-12 08:31:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រង្វង់មូលស្រអែម ត្រូវបានរៀបចំធ្វើពិធីបញ្ចុះបឋមសិលាដើម្បីកសាងរូបសំណាកប្រាសាទគោបុរៈទី៥ នៃប្រាង្គប្រាសាទព្រះវិហារ ក្រោមអធិបតីភាពលោកទេសរដ្ឋមន្ត្រី មាស សុភា ប្រធានក្រុមការងារថ្នាក់ជាតិចុះជួយខេត្តព្រះវិហារ លោក ឡុង សុវណ្ណ ប្រធានក្រុមប្រឹក្សាខេត្ត និងលោក អ៊ុន ចាន់ដា អភិបាលខេត្តព្រះវិហារ និងមានការចូលរួមពីមន្ត្រីរាជការជុំវិញខេត្តព្រះវិហារជាច្រើនរូបផងដែរ ។ កម្មវិធីនេះ ត្រូវបានប្រារព្ធធ្វើឡើងកាលពីរសៀលថ្ងៃទី១១ ខែធ្នូ ឆ្នាំ២០១៨ ស្ថិតក្នុងទីប្រជុំជនភូមិស្រអែមជើង ឃុំស្រអែម ស្រុកជាំក្សាន្ត ខេត្តព្រះវិហារ។

រូបគំរូនៃរូបសំណាក ប្រាសាទគោបុរ:ទី៥ នៃប្រាង្គប្រាសាទព្រះវិហារ ដែលត្រូវសង់នៅរង្វង់មូលស្រអែម ខេត្តព្រះវិហារ

លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារបានឱ្យដឹងថា ការសាងសង់រង្វង់មូលរូបសំណាកគោបុរៈទី៥ នៃប្រាសាទព្រះវិហារនេះ គឺមានការឧបត្ថម្ភគាំទ្រពីសំណាក់ លោកទេសរដ្ឋមន្រ្តី មាស សុភា លោក សួស យ៉ារ៉ា តំណាងរាស្រ្តមណ្ឌលខេត្តព្រះវិហារ លោក អ៊ុន ចាន់ដា អភិបាលខេត្ត លោកឧត្ដមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ ព្រមទាំងសប្បុរសជននានាផងដែរ។ លោកថា ទាំងនេះជាសមិទ្ធផលថ្មីមួយទៀតរបស់ខេត្តព្រះវិហារ បន្ទាប់ពីផ្លូវភ្លោះ និងបុស្បុកលោកតាសួង ដែលមានលោកអភិបាលខេត្តដឹកនាំក្នុងការកសាងឡើង។

បើតាមលោក មាស សុភា ក៏បានបញ្ជាក់បន្ថែមផងដែរថា ការសាងសង់រង្វង់មូលស្រអែមនេះ នឹងត្រូវសាងសង់ឱ្យរួចរាល់នៅមុនពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីទទួលភ្ញៀវទេសចរដែលទៅទស្សនាកម្សាន្តនៅតាមរមណីយដ្ឋាននានាក្នុងខេត្តព្រះវិហារ ជាពិសេសគឺប្រាសាទព្រះវិហារនេះតែម្តង។

ចំពោះការសាងសង់រូបសំណាក់គោបុរ:ទី៥ នៃប្រាសាទព្រះវិហារនេះ គឺមន្ទីរសាធារណការ និងដឹកជញ្ជូនខេត្តព្រះវិហារ ជាអ្នកទទួលខុសត្រូវក្នុងការសាងសង់ទាំងស្រុងផងដែរ៕

ប្រភព៖ AKP ប្រែសម្រួល៖ សំភី