ម៉ាឡេស៊ីប្រកាសឈប់នាំចេញស៊ុត ខណៈសិង្ហបុរីត្រូវការស៊ុតជាង ៧០% ពីម៉ាឡេស៊ី

2018-12-14 02:08:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសម៉ាឡេស៊ី កាលពីថ្ងៃចន្ទ ដើមសប្ដាហ៍នេះ បានប្រកាសថា ម៉ាឡេស៊ីគ្រោងនឹងបញ្ឈប់ការនាំចេញស៊ុតទៀតហើយ ក្នុងគោលបំណងធានាការផ្គត់ផ្គង់ឲ្យបានគ្រប់គ្រាន់សម្រាប់ទីផ្សារក្នុងស្រុករបស់ខ្លួន។

រូបភាព៖ អាជ្ញាធរចំណីអាហារកសិកម្មសិង្ហបុរី

ការប្រកាសរបស់ម៉ាឡេស៊ីនេះ គឺខណៈពេលដែលសិង្ហបុរីត្រូវការការនាំចូលស៊ុតពីម៉ាឡេស៊ីប្រមាណ ៧៣% កាលពីឆ្នាំ២០១៧ កន្លងទៅ។ នេះបើតាមអាជ្ញាធរចំណីអាហារកសិកម្មរបស់សិង្ហបុរី។ ការប្រកាសនេះ ក៏ស្របពេលដែលប្រទេសទាំងពីរកំពុងមានជម្លោះដែនទឹក និងដែនអាកាសជាមួយគ្នាផងដែរ។

ទោះយ៉ាងណា នៅថ្ងៃទី១៣ ខែធ្នូ ឆ្នាំ២០១៨នេះ អាជ្ញាធរចំណីអាហារកសិកម្មសិង្ហបុរីបានចេញមកបញ្ជាក់ថា សិង្ហបុរីមានប្រភពផ្សេងទៀតយ៉ាងច្រើនសម្រាប់តម្រូវការស៊ុត ស្របតាមយុទ្ធសាស្រ្តពិពិធកម្មចំណីអាហាររបស់ខ្លួន។ ក្នុងនោះ រួមមានទាំងកសិដ្ឋានក្នុងស្រុករបស់សិង្ហបុរី ដែលផលិតបាន ២៧% នៃការប្រើប្រាស់ស៊ុតសរុបក្នុងប្រទេសសិង្ហបុរី ខណៈតិចជាង ១% ទៀត នាំចូលពីប្រទសថៃ ជប៉ុន អូស្រ្ដាលី និងណូវែលហ្សេឡង់។

យោងតាមទីផ្សារផ្គត់ផ្គង់ទំនិញក្នុងប្រទេសសិង្ហបុរី NTUC Fairprice បានបញ្ជាក់ថា ប្រមាណ ៤០% នៃស៊ុតរបស់ខ្លួន គឺនាំចូលមកពីប្រទេសម៉ាឡេស៊ី ហើយតម្លៃវិញបានកើនឡើង ៥% កាលពីសប្ដាហ៍មុន។ ចំណែកទីផ្សារផ្គត់ផ្គង់ទំនិញមួយទៀតក្នុងប្រទេសសិង្ហបុរី Sheng Siong បានបញ្ជាក់ថា ប្រមាណ ៥០% នៃស៊ុតរបស់ខ្លួន នាំចូលមកពីម៉ាឡេស៊ី ហើយពេលនេះ Sheng Siong កំពុងពិចារណារនាំចូលពីប្រទេសថៃជំនួសវិញ៕

ប្រភព៖ Channelnewsasia ប្រែសម្រួល៖ វាសនា