Cambodia Airports រំពឹងថានឹងទទួលបានអ្នកដំណើរ ១០លាននាក់ នៅដំណាច់ឆ្នាំនេះ
- 2018-12-18 03:23:04
- ចំនួនមតិ 0 | ចំនួនចែករំលែក 0
Cambodia Airports រំពឹងថានឹងទទួលបានអ្នកដំណើរ ១០លាននាក់ នៅដំណាច់ឆ្នាំនេះ
ចន្លោះមិនឃើញ
ក្រោយពីការពង្រីកការសាងសង់ហេដ្ឋារចនាសម្ព័ន្ធ និងធ្វើឲ្យល្អប្រសើរឡើងនូវសេវាកម្មរបស់ខ្លួន ក្រុមហ៊ុន Cambodia Airports រំពឹងថា ភ្ញៀវទេសចរដែលធ្វើដំណើរក្នុងស្រុក និងក្រៅស្រុក តាមអាកាសយានដ្ឋានអន្តរជាតិទាំងបី គឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិខេត្តព្រះសីហនុ នឹងឈានដល់ ១០លាននាក់នៅដំណាច់ឆ្នាំ២០១៨នេះ។
លោក Éric DELOBEL នាយកប្រតិបត្តិក្រុមហ៊ុន Cambodia Airports នៅក្នុងដំណើរទស្សនកិច្ចទៅកាន់ខេត្តសៀមរាប ដែលរៀបចំដោយក្លឹបអ្នកកាសែតកម្ពុជា សហការជាមួយសហភាពអឺរ៉ុប កាលពីពេលថ្មីៗនេះ បានប្រាប់អ្នកសារព័ត៌មាននៅក្នុងអាកាសយានដ្ឋានអន្តរជាតិសៀមរាបថា៖ «កាលពីឆ្នាំ២០១៧ យើងទទួលបានអ្នកធ្វើដំណើរ៨,៨លាននាក់។ តែក្នុងឆ្នាំនេះ យើងបានដាក់គោលដៅថ្មី គឺយើងនឹងទទួលស្វាគមន៍អ្នកធ្វើដំណើរជាង១០លាននាក់»។
យោងតាមរបាយការណ៍ចុងក្រោយបំផុតរបស់ក្រសួងទេសចរចេញផ្សាយការពីខែតុលា កន្លងទៅ ភ្ញៀវទេសចរអន្តរជាតិតាមផ្លូវអាកាសចូលមកកម្ពុជាមានចំនួនជាង៣លាននាក់ក្នុងឆ្នាំ២០១៨ និង២លាននាក់ជាងក្នុងឆ្នាំ២០១៧ ហើយភ្ញៀវទេសចរដែលធ្វើដំណើរតាមអាកាសចេញទៅក្រៅប្រទេសមានសរុបជាង៦លាននាក់ក្នុងឆ្នាំ២០១៨ និង៥លាននាក់ក្នុងឆ្នាំ២០១៧។ ភ្ញៀវទេសចរណ៍ចិនស្ថិតក្នុងលំដាប់ថ្នាក់លេខមួយ។
កាលពីខែវិច្ឆិកាកន្លងទៅ អាកាសយានដ្ឋានអន្តរជាតិភ្នំពេញបាន សម្រេចការជួសជុលទ្រង់ទ្រាយធំនូវផ្លូវរត់សម្រាប់យន្តហោះធុនធ្ងន់ ប្រវែង៣០០០ម៉ែត្រ ដែលអស់ទឹកប្រាក់ ១២លានដុល្លារ។
វិស័យទេសចរណ៍គឺជាផ្នែកមួយដែលជួយរកចំណូលមួយផ្នែកធំដល់ប្រទេសកម្ពុជា ក្រៅពីវិស័យកាត់ដេរ សំណង់ និងកសិកម្ម។ យោងតាមក្រសួងទេសចរណ៍ វិស័យដ៏សំខាន់នេះបានផ្តល់ប្រាក់ចំណូលចូលរដ្ឋ ជារួមប្រមាណ ជា៣ពាន់លានដុល្លារដល់ប្រទេសកម្ពុជាក្នុងឆ្នាំ២០១៧ ហើយចំនួននេះមានការកើនឡើងជាង១៣ភាគរយបើធៀបនឹងឆ្នាំ២០១៦៕