អ្នកជំនាញថាវិស័យអចលនទ្រព្យកម្ពុជា នៅតែមានភាពល្អប្រសើរ សម្រាប់បណ្តាឆ្នាំខាងមុខ

2018-12-19 01:52:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអ្នកជំនាញអចលនទ្រព្យបានលើកឡើងស្រដៀងគ្នាថា វិស័យអចលនទ្រព្យរបស់កម្ពុជា នៅតែមានសុខភាពល្អប្រសើរ សម្រាប់ឆ្នាំបន្តបន្ទាប់ទៀតជាពិសេស អគារអាផាតម៉ិន និងខុនដូនៅក្នងរាជធានីភ្នំពេញ នឹងកើនឡើងលើសទ្វេដងនៅត្រឹមឆ្នាំ២០៣០ខាងមុខ។

យោងតាមការសិក្សាថ្មីមួយធ្វើឡើងដោយក្រុមហ៊ុន Vtrust Appraisal បានរកឃើញដែលបានធ្វើបទបង្ហាញនៅសណ្ឋាគារRaffle Le Royal កាលពីព្រឹកថ្ងៃទី១៨ ធ្នូ នេះ បានឲ្យដឹងថា វិស័យអចលនទ្រព្យនៅក្នុងប្រទេសកម្ពុជា នឹងនៅតែបន្តកើនឡើងលើសទ្វេរដងនៅត្រឹមឆ្នាំ២០៣០ ខាងមុខនេះ ខណៈអាផាតម៉ិននៅកម្ពុជាបច្ចុប្បន្ន មានចំនួន ៩០២១យូនីត ស្មើនឹង ៣៥៥គម្រោង។ ប៉ុន្តែចំនួនអាផាតម៉ិននឹងកើនដល់ ២៨០០០យូនីតនៅត្រឹមឆ្នាំ២០៣០ ជាការកើនឡើងក្នុងសេណារីយោធម្មតា បើពិនិត្យមើលពីចំនួននៃការផ្គត់ផ្គង់បច្ចុប្បន្ន។

សំណង់អាផាតម៉ិននៅរាជធានីភ្នំពេញ

លោក គុយ វ៉ាត ប្រធានក្រុមប្រឹក្សាភិបាលក្រុមហ៊ុន Vtrust Group មានប្រសាសន៍ឲ្យដឹងថា របាយការស្តីពីអចលនទ្រព្យដែលត្រូវបានបង្ហាញនេះ នឹងចូលរួមចំណែកក្នុងការអភិវឌ្ឍន៍វិស័យអចលនមានដំណើការល្អ និងនិរន្តរភាព ព្រមទាំងជួយទាក់ទាញវិស័យផ្សេងៗទៀតមានការរីកចម្រើនផងដែរ។

លោកបន្តថា “រហូតមកទល់ពេលនេះ យើងមិនទាន់ឃើញសញ្ញាអ្វីមួយគួរឲ្យបារម្ភនោះទេ ដោយសារកម្ពុជានៅតែរក្សាបានកំនើនសេដ្ឋកិច្ច ពិសេសស្ថេរភាពនយោបាយ និងស្ថេរភាពសង្គមរយៈពេលវែងបន្តទៀត”។

លោក ច្រឹក សុខនីម អគ្គនាយក្រុមហ៊ុន Century 21 Mekong ដែលទើបជាប់ឆ្នោតជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានឲ្យដឹងថា វិស័យអចលនទ្រព្យនៅក្នុងប្រទេសកម្ពុជា នៅតែមានដំណើរល្អប្រសើរសម្រាប់ឆ្នាំ២០១៩ខាងមុខនេះ និងនៅឆ្នាំបន្តបន្ទាប់ទៀត ជាពិសេសនៅក្នុងក្រោមខណ្ឌនៅក្នុងរាជធានីភ្នំពេញ ដោយសារកំណើនអ្នកវិនិយោគជាតិ និងអន្តរជាតិជាច្រើនកំពុងតែរកស៊ីក្នុងវិស័យនេះកាន់តែច្រើន ស្របទៅនឹងការសិក្សានេះបានរកឃើញថា ខណ្ឌចំការមន ខណ្ឌទួលគោក ខណ្ឌ៧មករា និងខណ្ឌដូនពេញដែលមានចំនួនអាផាតម៉ិនច្រើនជាងគេ។

របាយការណ៍សិក្សាខាងលើបានឲ្យដឹងទៀតថា នៅក្នុងដំណាច់ត្រីមាសទី៤នេះ អាផាតម៉ិនចំនួន ៧៦០០យូនីតត្រូវបានជួល ស្មើនឹងអត្រាគ្របដណ្តប់ការប្រើប្រាស់សរុប ៨៤ភាគរយ នៅទូទាំងរាជធានីភ្នំពេញ។ របាយការណ៍ដដែលបានឲ្យដឹងថា ក្នុងចំណោមអាផាតម៉ិនទាំងនោះ អាផាតម៉ិន១បន្ទប់គេង មានការផ្គត់ផ្គង់ច្រើនជាងគេក្នុងទីផ្សារ ស្មើនឹង៥៥ភាគរយនៃអាផាតម៉ិនសរុប និងអាផាតម៉ិន ២បន្ទប់គេង ស្មើនឹង៣៤ភាគរយនៃចំណែកទីផ្សារសរុប៕

ប្រភព៖ រស្មីកម្ពុជា ប្រែសម្រួល៖ សុខ សុវត្ថិ