ផ្លូវល្បឿនលឿន ភ្នំពេញ-បាវិត នឹងត្រូវចំណាយសាងសង់ច្រើនជាងផ្លូវ ភ្នំពេញ-ព្រះសីហនុ

2018-12-20 01:31:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្ដីក្រសួងសាធារណការ និងដឹកជញ្ជូន បានឱ្យដឹងកាលពីចុងសប្តាហ៍កន្លងទៅថា រហូតមកដល់ពេលនេះ ការសិក្សាផ្លូវល្បឿនលឿនពីរាជធានីភ្នំពេញ-បាវិត (ព្រំដែនកម្ពុជា-វៀតណាម) គឺបានសិក្សារួចរាល់ចប់សព្វគ្រប់អស់ហើយ ដែលត្រូវចំណាយថវិកាអស់ប្រមាណ ៣៨០០លានដុល្លារ។ នេះបើតាមការចុះផ្សាយរបស់វេបសាយក្រសួងព័ត៌មាន កាលពីថ្ងៃទី១៩ ខែធ្នូ ឆ្នាំ២០១៨។

លោកថ្លែងថា រាជរដ្ឋាភិបាលបានអនុញ្ញាតឱ្យទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន (JICA) ធ្វើការសិក្សាផ្លូវល្បឿនលឿនពីភ្នំពេញទៅបាវិត ដែលមានចម្ងាយផ្លូវប្រវែង ១៦០គីឡូម៉ែត្រ ដើម្បីធ្វើការសាងសង់ផ្លូវនេះ។

លោក ស៊ុន ចាន់ថុល ថ្លែងទៅកាន់អ្នកសារព័ត៌មានកាលពីពេលកន្លងមក

រដ្ឋមន្រ្តីរូបនេះ បានគូសបញ្ជាក់ថា ការចំណាយយ៉ាងច្រើនសម្រាប់សាងសង់ផ្លូវល្បឿនលឿននេះ ដោយសារតែផ្លូវដែលត្រូវសាងសង់ គឺមានលិចទឹក ហើយកាត់តាមបឹង ឬតំបន់លិចទឹកច្រើន ដែលមានប្រវែងរហូតដល់ ៨០គីឡូម៉ែត្រ ជាហេតុធ្វើឱ្យតម្លៃក្នុងការចំណាយសាងសង់ច្រើន។

លោក ស៊ុន ចាន់ថុល បានប្រៀបធៀបទៅនឹងការសាងសង់ផ្លូវល្បឿនលឿន ពីភ្នំពេញ ទៅខេត្ដព្រះសីហនុ ដែលមានប្រវែង១៩០គីឡូម៉ែត្រនោះ គឺចំណាយថវិកា ប្រមាណតែ ២ពាន់លានដុល្លារប៉ុណ្ណោះ ដោយសារផ្លូវនេះ មិនមានការសាងសង់ឆ្លងកាត់បឹង ឬតំបន់លិចទឹក ដូចផ្លូវល្បឿនលឿនពីភ្នំពេញ ទៅបាវិតនោះទេ។

ដោយសារតែទំហំទឹកប្រាក់ក្នុងការចំណាយសាងសង់ផ្លូវល្បឿនលឿនពីភ្នំពេញ ទៅបាវិតនេះ គឺមានចំនួនច្រើនពេកនោះ រាជរដ្ឋាភិបាលមិនទាន់សម្រេចធ្វើការសាងសង់ ឬយ៉ាងណាទេ ដោយកំពុងតែស្វែងរកដៃគូវិនិយោគពីវិស័យឯកជន ដើម្បីកសាង។ នេះបើតាមការលើកឡើងបន្ថែមរបស់រដ្ឋមន្រ្តីក្រសួងសាធារណការ៕

អត្ថបទ៖ សំភី