សហព័ន្ធ ប្រតិកម្មនឹងអង្គការសិទ្ធិមនុស្ស HRW ជុំវិញការរិះគន់មកលើ Honda

2018-12-21 06:45:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធកីឡាបាល់ទាត់កម្ពុជា តាមរយៈសេចក្តីថ្លែងការណ៍នៅថ្ងៃទី២១ ខែធ្នូ ឆ្នាំ២០១៨នេះ បានហៅការចោទប្រកាន់របស់អង្គការឃ្លាំមើលសិទ្ធិមនុស្សអន្តរជាតិ (HRW) មកលើលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ថាមានចរិតនយោបាយដែលមិនត្រឹមតែបន្ទុចបង្អាក់ការរួមចំណែករបស់ Honda ក្នុងវិស័យបាល់ទាត់នៅកម្ពុជាប៉ុណ្ណោះទេ ប៉ុន្តែនៅក្នុងតំបន់អាស៊ាន ទ្វីបអាស៊ី និងអន្តរជាតិផងដែរ។

ប្រតិកម្មនេះ ធ្វើឡើងក្រោយពេលដែលលោក Brad Adams នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការ HRW បានរិះគន់ថា ការណ៍ដែលលោក Honda ចាប់ដៃធ្វើការជាមួយលោក សៅ សុខា ប្រធានសហព័ន្ធកីឡាបាល់ទាត់កម្ពុជា នឹងបង្កើតឱ្យមានភាពអាប់ឱនដល់មុខមាត់របស់លោកផង និងមុខមាត់ជាតិ (ជប៉ុន) របស់លោកផង។ លោក Brad Adams បានចោទលោក សៅ សុខា ថាមានការជាប់ពាក់ព័ន្ធក្នុងរឿងរំលោភសិទ្ធិមនុស្សនៅកម្ពុជា។

Keisuke Honda ចាប់ដៃជាមួយលោក សៅ សុខា ក្នុងសន្និសីទសារព័ត៌មានកាលពីខែសីហា ឆ្នាំ២០១៨។ រូបថត៖ សហព័ន្ធកីឡាបាល់ទាត់កម្ពុជា

ក្នុងសេចក្តីប្រកាសព័ត៌មានខាងលើ បញ្ជាក់ថា សហព័ន្ធកីឡាបាល់ទាត់កម្ពុជា ដែលដឹកនាំដោយលោក សៅ សុខា គឺជាសមាជិកដ៏ល្អរបស់សហព័ន្ធកីឡាបាល់ទាត់ AFF, AFC និង FIFA។ ក្រោមការចូលរួមចំណែករបស់សហព័ន្ធកីឡាបាល់ទាត់អន្តរជាតិទាំងនេះ សហព័ន្ធកីឡាបាល់ទាត់កម្ពុជា បាននឹងកំពុងដំណើរការអភិវឌ្ឍន៍ ដើម្បីឆ្ពោះទៅកាន់ពានរង្វាន់ស៊ីហ្គេមឆ្នាំ២០២៣ និងពានរង្វាន់នានាជាបន្តបន្ទាប់។

សហព័ន្ធបញ្ជាក់ថា Honda គឺជាកីឡាករលំដាប់ពិភពលោកដែលបានលេងក្នុងពានរង្វាន់ FIFA World Cup បីជំនាន់ ហើយជាកីឡាករតែមួយគត់មកពីតំបន់អាស៊ី ដែលអាចរកគ្រាប់បាល់ក្នុងព្រឹត្តិការណ៍នេះ ៣ជំនាន់បន្តបន្ទាប់គ្នា និងជាកីឡាករជាទីស្រឡាញ់ និងជាគោរពរបស់អ្នកស្នេហាកីឡាបាល់ទាត់ក្នុងពិភពលោក។ Honda បានស្ម័គ្រចិត្តចូលរួមចំណែកអភិវឌ្ឍកីឡាបាល់ទាត់កម្ពុជា ដើម្បីជំរុញវិស័យកីឡាបាល់ទាត់កម្ពុជា ឆ្ពោះទៅកាន់កម្រិតតំបន់ និងទ្វីបអាស៊ី។

សូមជម្រាបថា Keisuke Honda បានក្លាយជាអ្នកចាត់ការទូទៅក្រុមជម្រើសជាតិកម្ពុជា កាលពីខែសីហា ឆ្នាំ២០១៨ ក្នុងកិច្ចសន្យារយៈពេល ២ឆ្នាំ ដោយមិនយកប្រាក់កម្រៃ៕

អត្ថបទ៖ សំភី