បឹងយក្សឡោម ជាប់លេខ១២ ជាបឹងស្អាត កើតចេញពីបន្ទុះភ្នំភ្លើងលើពិភពលោក

2018-12-22 01:31:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមគេហទំព័រ EARTH Porm បានផ្សាយថ្មីៗនេះថា បឹងយក្សឡោម ស្ថិតក្នុងក្រុងបានលុងខេត្តរតនគិរី បានជាប់លេខ១២ ក្នុងចំណោមបឹងធម្មជាតិដែលកើតចេញពីបន្ទុះភ្នំភ្លើងកាលពី៤០០០ឆ្នាំមុនមកម្ល៉េះ ចំនួន១៥ ដែលគេស្រាវជ្រាវរកឃើញនៅលើពិភពលោក។

លោក ង៉ែត្រ វិទូ ប្រធានមន្ទីរទេសចរណ៍ខេត្តរតនគិរី បានឲ្យដឹងកាលពីថ្ងៃទី២១ខែធ្នូថា បើទោះបីជាបឹងយក្សឡោម ជាប់បានចំណាត់ថ្នាក់លេខ១២នៅលើពិភពលោកក៏ដោយ ក៏មិនចាញ់បឹងបន្ទុះភ្នំភ្លើងមានសម្រស់ស្អាតដាច់គេជាប់លេខ១ នៅសហរដ្ឋអាមេរិកឡើយ។ លោកថា បឹងយក្សឡោមកើតចេញពីបន្ទុះភ្នំភ្លើង មានជម្រៅ ៤៧ម៉ែត្រ មានព្រៃឈើដុះព័ទ្ធជុំវិញផ្តល់នូវសម្រស់បៃតង និងមានទឹកថ្លាពណ៌ខៀវស្រងាត់។ ចំណែកបឹងធម្មជាតិកើតចេញពីបន្ទុះភ្នំភ្លើងជាប់លេខ១ ស្ថិតនៅលើភ្នំ Mazama ក្នុងរដ្ឋ Oregon ភាគខាងលិច នៃសហរដ្ឋអាម៉េរិក មានជម្រៅរណ្ដៅ ៥៩៤ម៉ែត្រ។

ទោះបីបឹងយក្សឡោមជាប់បានលេខ១២នៅលើពិភពលោកក្តី ក៏លោក វិទូ នៅតែអួតសរសើរមិនដាច់ពីមាត់ថា បឹងយក្សឡោមស្អាតជារមណីយដ្ឋានអេកូទេសចរណ៍ មានម្លប់ដើមឈើត្រជាក់ ភ្ញៀវទេសចរណាបានមកដល់ឃើញជាក់ស្តែង ពិតជាស្ងោចសរសើរមិនដាច់ពីមាត់ និងចង់មកលេងម្តងហើយម្តងទៀត។ នៅឆ្នាំ២០១៨នេះ ទេសចរណ៍ខេត្តរតនគិរី ទទួលភ្ញៀវជាតិបានជាង ១៩ម៉ឺននាក់ និងទេសចរអន្តរជាតិបានជាង ២,៤ម៉ឺននាក់ កើនជាង ១០% បើធៀបទៅនឹងឆ្នាំ២០១៧។

គួរបញ្ជាក់ថា បឹងធម្មជាតិកើតចេញពីបន្ទុះភ្នំភ្លើងរាប់ពាន់ឆ្នាំ ទាំង១៥ មានដូចជា នៅអាមេរិក២កន្លែង នៅហ្វីលីពីន ២កន្លែង នៅអៀរឡង់ នៅឥណ្ឌូណេស៊ី នៅអេក្វាទ័រ នៅព្រំដែនកូរ៉េខាងជើង នៅអេស្ប៉ាញ នៅជប៉ុន ២កន្លែង នៅស៊ីលី នៅប្រទេសអាហ្វ្រីក និងនៅកម្ពុជា៕

ប្រភព៖ រស្មីកម្ពុជា ប្រែសម្រួល៖ លាភ.