ស្លាប់និងរបួស១៥នាក់ ដោយសារ គ្រោះថ្នាក់ចរាចរណ៍ក្រឡាប់រថយន្ត នៅស្រុកបុទុមសាគរ

2018-12-24 01:36:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កត្តាមិនស្គាល់ភូមិសាស្ត្រធ្វើឲ្យអ្នកបើកបររថយន្តកូរ៉េដឹកក្រុមភ្លេង ធ្លាក់ជ្រោះបណ្តាលឲ្យមនុស្ស ៤នាក់ បានស្លាប់ និង ១១នាក់ទៀត រងរបួសធ្ងន់ស្រាល នៅចំណុចអន្ទង់អាំងធំ ចន្លោះគីឡូម៉ែត្រលេខ៦១-៦២ ស្ថិតក្នុងភូមិជីមាល ឃុំអណ្តូងទឹក ស្រុកបុទុមសាគរ ខេត្តកោះកុង កាលពីវេលាម៉ោង១២:៣០នាទីថ្ងៃត្រង់ ថ្ងៃទី២៣ធ្នូ ឆ្នាំ២០១៨។ នេះបើយោងតាមវេបសាយ អគ្គស្នងការដ្ឋាននគរបាលជាតិ ចុះថ្ងៃទី២៣ធ្នូ។

មន្ត្រីនគរបាលខេត្តកោះកុងបានឲ្យដឹងថា ពិតជាមានករណីរថយន្តក្រឡាប់ គឺបើកបរក្រឡាប់ដោយខ្លួនឯង បណ្តាលឲ្យមនុស្សស្លាប់ចំនួន ៤នាក់ ស្រី២នាក់ និងរងរបួសធ្ងន់ ៥នាក់ ស្រី ៣នាក់ និងរបួសស្រាល ៦នាក់ ស្រី ១នាក់។ មន្ត្រីនគរបាលថា ករណីនេះដោយសារអ្នកបើកបរមិនស្គាល់ភូមិសាស្ត្រច្បាស់លាស់ និងបើកបរប្រើល្បឿនលឿន ពេលចុះចំណោត ជាន់ហ្វ្រាំងមិនស៊ី ដាក់លេខមិនចូល។

មន្ត្រីនគរបាលបន្តថា រថយន្តខាងលើ ជាប្រភេទរថយន្តកូរ៉េ ពណ៌ស ធ្វើដំណើរពីខេត្តកំពង់ស្ពឺ មកខេត្តកោះកុង ជាក្រុមភ្លេង ដើម្បីមកច្រៀងក្នុងពិធីមង្គការរបស់ប្រជាពលរដ្ឋ នៅឃុំត្រពាំងរូង ស្រុកកោះកុង។ ស្រាប់តែមកដល់ចំណុចកើតហេតុខាងលើ បានជួបគ្រោះថ្នាក់ចរាចរណ៍ក្រឡាប់ធ្លាក់ចេញពីផ្លូវចូលជ្រោះជ្រៅ។

អ្នករងរបួស ត្រូវបានដឹកមកកាន់មន្ទីរពេទ្យ ដែលនៅក្បែរៗនោះដើម្បីសង្គ្រោះបឋម និងបញ្ជូនបន្តមកមន្ទីរពេទ្យខេត្ត៕