ឆ្នាំ២០១៨ កម្ពុជានាំអង្ករចេញ បានជាង ៦២ម៉ឺនតោន
- 2019-01-10 06:41:22
- ចំនួនមតិ 0 | ចំនួនចែករំលែក 0
ឆ្នាំ២០១៨ កម្ពុជានាំអង្ករចេញ បានជាង ៦២ម៉ឺនតោន
ចន្លោះមិនឃើញ
របាយការណ៍ផ្លូវការ របស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្ករ នៅព្រឹកថ្ងៃទី១០ ខែមករា ឆ្នាំ២០១៩នេះ បានបញ្ជាក់ថា នៅឆ្នាំ២០១៨ កម្ពុជាបាននាំចេញអង្ករ ទៅទីផ្សារអន្តរជាតិជាង ៦២ម៉ឺនតោន (៦២៦២២៥) ធ្លាក់ចុះ ១,៥% បើធៀបនឹងឆ្នាំ២០១៧ ដែលមានចំនួន ៦៣៥៦៧៩តោន។
ប្រភេទអង្ករដែលកម្ពុជានាំចេញទៅទីផ្សារអន្តរជាតិមាន៖ អង្ករក្រអូបចំនួន ៤៩៣៥៩៧តោន ស្មើនឹង ៧៨,៨២% អង្ករសគ្រាប់វែង ចំនួន១០៥៩៩០តោន ស្មើនឹង១៦,៩៣% និងអង្ករចំហុយ គ្រាប់វែងចំនួន ២៦៦៣៨តោន ស្មើនឹង៤,២៥%។ ចំពោះទីផ្សារដែលទិញអង្ករកម្ពុជាច្រើនជាងគេ គឺទីផ្សារសហគមន៍អឺរ៉ុបដែលមានចំនួនជិត ២៧ម៉ឺនតោន ស្មើនឹង៤២,៩៨% នៃចំនួនដែលបាននាំចេញទាំងអស់។
ចំណែកប្រទេសដែលទិញអង្ករពីកម្ពុជាច្រើនជាងគេវិញ គឺប្រទេសចិន ចំនួនជាង១៧ម៉ឺនតោន ស្មើនឹង២៧,១៧% ប្រទេសបារាំង ឈរនៅលំដាប់លេខ២ ជិត៩ម៉ឺនតោន លេខ៣ ប្រទេសម៉ាឡេស៊ី ជាង៤ម៉ឺនតោន លេខ៤ប្រទេស Gabon ជាង៣ម៉ឺនតោន លេខ៥ ប្រទេសហូឡង់ ជាង២,៦ម៉ឺនតោន លេខ៦ ប្រទេសវៀតណាម ជាង២,៦ម៉ឺនតោន លេខ៧ ប្រទេសថៃ ជាង ២,៣ម៉ឺនតោន លេខ៨ ប្រទេសប៉ូឡូញ ជាង២,៣ម៉ឺនតោន លេខ៩ ប្រទេសបែលហ្ស៊ិក ជិត២ម៉ឺនតោន និងលេខ១០ ប្រទេសអង់គ្លេស ជិត២ម៉ឺនតោន។
សម្រាប់កត្តាដែលធ្វើឲ្យការនាំចេញធ្លាក់ចុះ ត្រូវបានរដ្ឋាភិបាលអះអាងថា មានកត្តា ២យ៉ាង ក្នុងនោះ មានកត្តាអន្តនោម័ត និងកត្តាសត្យានុម័ត។ កត្តាអន្តនោម័ត ត្រូវបានរដ្ឋាភិបាលពន្យល់ថា បណ្តាលមកពីការខ្វះខាតថវិការទិញអង្ករពីប្រជាពលរដ្ឋ ផលិតភាព និងការហូរចេញស្រូវទៅប្រទេសជិតខាង។ ចំណែកកត្តាសត្យានុម័ត គឺបណ្តាលមកពីវិបត្តនៅក្នុងតំបន់ និងពិភពលោក ដែលមានគូរប្រកួតប្រជែងច្រើន ហើយប្រទេសនានា នៅក្នុងតំបន់អាស៊ាន បានផលិតស្រូវដូចគ្នាដើម្បីនាំចេញ៕