ថៃ ត្រៀមលុយជាង ៧០លានដុល្លារ ទិញរថក្រោះបន្ថែមបង្គ្រប់ជាង៥០គ្រឿង

2019-01-14 07:03:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងការពារជាតិថៃ បានស្នើទៅកាន់គណៈរដ្ឋមន្ត្រីដើម្បីសម្រេចក្នុងការទិញបន្ថែម រថក្រោះពីប្រទេសចិន ចំនួន ១៤គ្រឿងបន្ថែម ប្រភេទ VT-4 ដែលមានតម្លៃជាង ២,៣ ពាន់លានបាត ឬជាង ៧០លានដុល្លារអាមេរិក។ នេះបើយោងតាមការចុះផ្សាយរបស់ Bangkok Post នៅថ្ងៃទី១៤ ខែមករា ឆ្នាំ២០១៨។

រថក្រោះប្រភេទ VT-4 ដែលថៃបានទិញពីចិន កាលពីឆ្នាំ២០១៧ (រូបថត៖ Bangkok Post)

ថៃ គ្រោងទិញរថក្រោះ VT-4 ពីក្រុមហ៊ុនចិន China Ordnance Industries Group Corporation Limited ។ ក្នុងនោះ រថក្រោះមួយគ្រឿង មានតម្លៃប្រមាណជាង ៥,២ លានដុល្លារអាមេរិក។ បើជោគជ័យ ការទិញរថក្រោះទាំង ១៤គ្រឿង គឺជាការទិញលើកទី៣ បន្ទាប់ពីការទិញលើកទី១ ពីក្រុមហ៊ុនដដែល ដែលមានចំនួន ២៨គ្រឿងកាលពីឆ្នាំ២០១៦ តម្លៃជាង ១៥៣លានដុល្លារ និងលើកទី២ ចំនួន ១១គ្រឿងកាលពីឆ្នាំ២០១៧ តម្លៃជាង ៦២លានដុល្លារ។

ការចំណាយទាំង៣លើកក្នុងការទិញរថក្រោះចិននេះ គឺបន្ទាប់ពី ក្រសួងការពារជាតិថៃ ទទួលបរាជ័យក្នុងការទិញរថក្រោះប្រភេទ T-84 Oplot-M ពីក្រុមហ៊ុន Ukroboronprom ដែលមានមូលដ្ឋាននៅប្រទេសអ៊ុយក្រែន ដោយសារជម្លោះដែលអូសបន្លាយរវាងរុស្ស៊ី ជាមួយអ៊ុយក្រែន។

Bangkok Post បានចុះផ្សាយទៀតថា ក្រសួងការពារជាតិថៃ ក៏មានបំណងទិញប្រភេទគ្រាប់ប្រឆាំងរថពាសដែក APFSDS-T ចំនួន ១៩០គ្រាប់, គ្រាប់ប្រឆាំងរថក្រោះ Heat-T ចំនួន ៦០គ្រាប់ និងគ្រាប់ HE-T ចំនួន ១៥០គ្រាប់ផងដែរ៕

អត្ថបទ៖ លាភ.