ត្រីសំខាន់ៗនៅកម្ពុជាបានថយចុះ និងអាចឈានទៅរកការផុតពូជ

2019-01-15 06:16:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ទុំ នីរ៉ូ នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងបានបញ្ជាក់ថា អ្នកនេសាទមានការកើនឡើងពីមួយឆ្នាំទៅមួយឆ្នាំ ហើយពូជត្រីសំខាន់ៗមួយចំនួន បាននឹងកំពុងរងការផុតពូជ ដោយសារអ្នកនេសាទខ្លះ លួចនេសាទ នៅតាមអន្លង់អភិរក្ស បង្កផលប៉ះពាល់ដល់ពូជត្រី ពិសេសការប្រើប្រាស់ឧបករណ៍ល្មើសច្បាប់តែម្តង។

លោកបន្តថា អន្លង់ជ្រៅៗតាមដងទន្លេនីមួយៗក្នុងខេត្តនេះ គឺជាជម្រកត្រីបន្តពូជយ៉ាងសំខាន់។ ត្រីខ្លះដូចជាត្រីរាជ ត្រីគល់រាំង ត្រីត្រសក់ ត្រីនាគ ត្រីស្ទក់ ពិសេសត្រីប៉ាវ៉ានិងត្រីប៉ាស៊ីអ៊ីមានឈ្មោះល្បីនៅខេត្តស្ទឹងត្រែង កំពុងថយចុះពីមួយឆ្នាំទៅមួយឆ្នាំគួរឲ្យបារម្ភជាខ្លាំង។

«ដូច្នេះទើបតម្រូវឲ្យយើងទាំងអស់គ្នាក្នុងនាមជាប្រជាពលរដ្ឋនិងជំនាញព្រមទាំងអ្នកពាក់ព័ន្ធផ្សេងៗទៀតរួមគ្នាដើម្បីដោះស្រាយរាល់បញ្ហា ធ្វើម៉េចកុំឲ្យធនធានទាំងអស់នេះថមថយទៅ ឬក៍ឈានទៅរកការដាច់ពូជ»។ នេះជាការអំពាវនាវរបស់លោក ទុំ នីរ៉ូ។

ចំណែកប្រធានសហគមន៍នេសាទភូមិថ្មីសង្កាត់សាមគ្គីលោក ឆែម ប៊ុនធឿន ក៏បានអះអាងដែរថា បច្ចុប្បន្នប្រភេទត្រីសំខាន់ៗសម្រាប់ការធ្វើនេសាទ ជាលក្ខណៈគ្រួសារកម្របានជួបប្រទះណាស់។ នេះគឺជាសញ្ញាមួយបង្ហាញពីភាពបាត់បង់ទៅៗ។

លោកថា កត្តានេះសូមប្រជានេសាទគួរចូលរួមគោរពច្បាប់ជលផលទាំងអស់គ្នា ឲ្យបានគ្រប់រដូវ ជៀសវាងប្រើប្រាស់ឧបករណ៍ល្មើសច្បាប់ ហើយងាកត្រឡប់មកប្រើប្រាស់មង ឬដាក់សន្ទូច លប ទ្រូ ។ល។ ជាលក្ខណៈគ្រួសារវិញ។

លោក ឆែម ប៊ុនធឿន និយាយយ៉ាងដូច្នេះថា៖ «កុំទៅនេសាទនៅកន្លែងអន្លង់អភិរក្ស ដើម្បីការពារត្រីមេពូជដូចជាត្រីប៉ាសេអ៊ី ត្រីគល់រាំងជាដើម។ កុំប្រើប្រាស់ឧបកណ៍នេសាទខុសច្បាប់ ដូចជាឆក់បំពុល គប់គ្រាប់។ យើងត្រូវចូលរួម ទប់ស្កាត់ និងកាត់បន្ថយការនេសាទត្រីមេពូជ នៅក្នុងទន្លេនិងជួយអភិរក្សទាំងអស់គ្នា»។

បើតាមលោកផល លុយ មន្ត្រីអង្គការសេប៉ាប្រចាំខេត្តស្ទឹងត្រែង និយាយថា ខាងអង្គការជាដៃគូកំពុងធ្វើសកម្មភាពពង្រឹងសមត្ថភាពដល់ប្រជាសហគមន៍ និងប្រជាកសិករដើម្បីបង្កើតឲ្យមានមុខរបរប្រចាំគ្រួសារដូចជាការចិញ្ចឹមត្រី បង្កើតសួនបន្លែប្រចាំគ្រួសារជាដើមសម្រាប់ជួយគាត់ឱ្យងាកមកប្រកបរបរនេះវិញ ទើបអាចការពារធនធានមច្ឆជាតិនេះបាន។

គួរជម្រាបថា នៅឆ្នាំ២០១៨ ខណ្ឌជលផល បានអប់រំប្រជាអ្នកនេសាទចំនួន ៥៨០នាក់ បង្ក្រាបបទល្មើសដកហូតបានមង២៥៧ត្បូងស្មើនឹង ៥១ ៩៣៩ម៉ែត្រ ក្បាលឆក់១១គ្រឿង និងបញ្ជូនខ្លួនជនសង្ស័យចំនួន៤នាក់អនុវត្តតាមនិតិវិធី៕

ប្រភព៖ រស្មីកម្ពុជា ប្រែសម្រួល៖ សំភី