វៀតណាម សហការជាមួយ Amazon លក់ទំនិញអនឡាញ

2019-01-15 08:00:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទីភ្នាក់ងារផ្សព្វផ្សាយពាណិជ្ជកម្ម នៃក្រសួងឧស្សាហកម្ម និងពាណិជ្ជកម្មរបស់ប្រទេសវៀតណាម បានប្រកាសចាប់ដៃគូសហប្រតិបត្តិការជាមួយក្រុមហ៊ុន Amazon ដើម្បីគាំទ្រដល់សហគ្រាសធុនតូច និងមធ្យម (SMEs) ក្នុងការរួមបញ្ចូលទៅក្នុងប្រព័ន្ធពាណិជ្ជកម្មអេឡិចត្រូនិក (e-commerce) របស់ក្រុមហ៊ុនលក់ទំនិញអនឡាញដ៏ធំមួយនេះ។

ពិធីប្រកាសសហប្រតិបត្តិការរវាង ទីភ្នាក់ងារផ្សព្វផ្សាយពាណិជ្ជកម្មវៀតណាម និង Amazon Global Selling Group នៅក្រុងហាណូយ កាលពីថ្ងៃទី១៤ ខែមករា ឆ្នាំ២០១៩ (រូប៖ Vietnam+)

ការប្រកាសពីការចាប់ដៃគូសហប្រតិបត្តិការគ្នានេះ ត្រូវបានធ្វើឡើង នៅក្នុងពិធីមួយ ដែលរៀបចំឡើងដោយទីភ្នាក់ងារផ្សព្វផ្សាយពាណិជ្ជកម្មវៀតណាម និង Amazon Global Selling Group នៅក្រុងហាណូយ កាលពីថ្ងៃទី១៤ ខែមករា ឆ្នាំ២០១៩។

លោក Vu Ba Phu នាយកទីភ្នាក់ងារផ្សព្វផ្សាយពាណិជ្ជកម្ម បានថ្លែងក្នុងពិធីខាងលើថា ក្រៅពីជួយគាំទ្រដល់សហគ្រិនវៀតណាម ក្នុងការផ្សព្វផ្សាយទំនិញសម្រាប់នាំចេញ Amazon ក៏ជួយឲ្យមានប្រសិទ្ធភាពថែមទៀត ក្នុងការលក់ផងដែរ។ លោកបន្តថា តាមរយៈ Amazon នេះ ទំនិញសហគ្រាសធុនតូច និងមធ្យម នឹងអាចឈានចូលក្នុងទីផ្សារពិភពលោកបាន។

លោក Phu សង្ងត់ធ្ងន់ថា ការចេះភាសាបរទេសនានា និងវិធីធ្វើជំនួញបែបអន្តរជាតិ ជារឿងដ៏សំខាន់សម្រាប់សហគ្រិនទាំងឡាយ ព្រមទាំងគុណភាពទំនិញ ដែលត្រូវឆ្លើយតបនឹងស្ដង់ដារទីផ្សារអន្តរជាតិ។

លោក Bernard Tay នាយកក្រុមហ៊ុន Amazon ប្រចាំតំបន់អាស៊ីអាគ្នេយ៍ បានថ្លែងថា ការនាំចេញតាមរយៈក្រុមហ៊ុនរបស់លោក គឺជាឱកាសមួយដែលមានលក្ខណៈជាសកល និងឆ្លងពីប្រទេសមួយទៅប្រទេសមួយទៀត ហើយសហគ្រាសទាំងឡាយ នឹងអាចអភិវឌ្ឍអាជីវកម្មអនឡាញរបស់ពួកគេ ឲ្យកាន់តែល្អប្រសើរថែមទៀត៕

ប្រភព៖ Vietnam News ប្រែសម្រួល៖ លាភ.