សត្វក្រពើភ្នំ បាត់បង់ជម្រកប្រវត្តិសាស្រ្តរបស់វាប្រហែល ៩៩%
- 2019-01-21 03:44:51
- ចំនួនមតិ 0 | ចំនួនចែករំលែក 0
សត្វក្រពើភ្នំ បាត់បង់ជម្រកប្រវត្តិសាស្រ្តរបស់វាប្រហែល ៩៩%
ចន្លោះមិនឃើញ
សត្វក្រពើភ្នំ ធ្លាប់មានចំនួនច្រើនណាស់ក្នុងតំបន់ទំនាបកណ្តាលអាស៊ីអាគ្នេយ៍ នៅតាមទីជម្រកតំបន់ដីសើម មានដូចជាទន្លេ បឹង តំបន់ដីលិចទឹក និងតំបន់វាលល្បាប់។ ប៉ុន្តែប្រភេទសត្វនេះ បានបាត់បង់ប្រហែល ៩៩% នៃជម្រកប្រវត្តិសាស្ត្ររបស់វា (បើយោងតាមរបាយការណ៍ FFI)។ នេះបើតាមការចុះផ្សាយរបស់អង្គការមូលនិធិសកលសម្រាប់អភិរក្សធនធានធម្មជាតិ WWF-កម្ពុជា កាលពីថ្ងៃទី១៦ ខែមករា ឆ្នាំ២០១៩។
ប្រភេទសត្វក្រពើភ្នំត្រូវបានចាត់ថ្នាក់ជាសត្វទទួលរងគ្រោះជិតផុតពូជក្នុងឆ្នាំ ១៩៩៤ ហើយបន្ទាប់មកត្រូវបានគេចាត់ថ្នាក់ជាប្រភេទសត្វទទួលរងគ្រោះជិតផុតពូជខ្លាំងបំផុត ក្នុងឆ្នាំ១៩៩៦ ក្នុងបញ្ជីក្រហម IUCN។ បច្ចុប្បន្នប្រភេទសត្វក្រពើភ្នំជាប្រភេទសត្វល្មូនដ៏កម្របំផុតរបស់ពិភពលោក ហើយមានរបាយចំនួននៅរាយប៉ាយ និងតិចតួចបំផុត ក្នុងប្រទេសកម្ពុជា ឥណ្ឌូណេស៊ី ឡាវ ថៃ និងវៀតណាម។
បើតាមអង្គការ WWF លើកឡើងថា ស្ថានភាពចំនួនសត្វក្រពើភ្នំដ៏គួរឱ្យព្រួយបារម្ភបែបនេះ វាពិតជាមានសារសំខាន់ខ្លាំងណាស់សម្រាប់ការអភិរក្សសត្វក្រពើភ្នំនេះ។
ដើម្បីចូលរួមក្នុងការអភិរក្សសត្វក្រពើភ្នំ អង្គការ WWF-កម្ពុជា នឹងធ្វើការសិក្សាស្រាវជ្រាវចំនួនរបស់វា ក្នុងតំបន់ទេសភាពខ្ពង់រាបភាគខាងកើត (EPL) ក្នុងឆ្នាំ២០១៩នេះ។
ដើម្បីធានាបានថា ទិន្នន័យនៃការសិក្សាស្រាវជ្រាវមានគុណភាពអាចទុកចិត្តបាន អង្គការ WWF-កម្ពុជា បានរៀបចំវគ្គបណ្តុះបណ្តាលនៃការសិក្សាស្រាវជ្រាវចំនួនក្រពើភ្នំ ទៅដល់ក្រុមការងារសិក្សាស្រាវជ្រាវជីវៈចម្រុះ ដែលរួមមាន ក្រុមសិក្សាស្រាវជ្រាវជីវៈចម្រុះសហគមន៍ ០៧ នាក់ មន្ត្រីមន្ទីរបរិស្ថានខេត្តមណ្ឌលគិរី ០១ នាក់ និងបុគ្គលិកអង្គការ WWF-កម្ពុជា ០៤ នាក់។ អ្នកជំនាញ ០២ រូប មកពីអង្គការសត្វព្រៃ និងរុក្ខជាតិ អន្តរជាតិ (Fauna & Flora International) បានអញ្ជើញចូលរួមជាគ្រូបណ្តុះបណ្តាលដល់ក្រុមការងារសិក្សាស្រាវជ្រាវជីវៈចម្រុះរបស់អង្គការ។
វគ្គបណ្តុះបណ្តាលនេះ មានរយៈពេលចំនួន ០៦ ថ្ងៃ ដែលក្នុងនោះ មានវគ្គបណ្តុះបណ្តាលអំពីទ្រឹស្តីចំនួន ០១ ថ្ងៃ នៅការិយាល័យអង្គការ WWF-កម្ពុជា ក្នុងក្រុងសែនមនោរម្យ ខេត្តមណ្ឌលគិរី និង ០៥ ថ្ងៃ ទៀត មានការអនុវត្តផ្ទាល់ក្នុងគោលដៅតាមដងទន្លេនានា ស្ថិតក្នុងតំបន់ទេសភាពខ្ពង់រាបភាគខាងកើត (EPL)។ វគ្គបណ្តុះបណ្តាលនេះ ផ្តោតសំខាន់លើវិធីសាស្ត្រប្រមូលទិន្នន័យស្រាវជ្រាវ អំពីសត្វក្រពើភ្នំ ដូចជាលាមកក្រពើ ការប្រមូលសំណាក ការមើលដាន ការប្រទះឃើញដោយផ្ទាល់ និងការដើរឆ្លុះមើលសត្វក្រពើភ្នំនៅពេលយប់ ដើម្បីស្វែងយល់អំពីជម្រកដែលសត្វក្រពើភ្នំចូលចិត្តរស់នៅផងដែរ។
អង្គការដដែលនេះបានឱ្យដឹងថា ក្នុងពេលអនុវត្តការសិក្សាស្រាវជ្រាវ ក្រុមការងារបានប្រទះឃើញមានសញ្ញាជាច្រើន ដែលអាចបញ្ជាក់ពីវត្តមានរបស់សត្វក្រពើភ្នំ ដែលជាសត្វមានចំនួនតិចតួចបំផុតនៅក្នុងតំបន់ទេសភាពខ្ពង់រាបភាគខាងកើត (EPL)។ វគ្គបណ្តុះបណ្តាល និងការសិក្សាស្រាវជ្រាវបន្ថែមទៀត ដោយការជិះទូកតាមដងទន្លេ នឹងជួយឱ្យការសិក្សាស្រាវជ្រាវអាចបង្ហាញព័ត៌មានបន្ថែមជាច្រើនទៀត អំពីចំនួនសត្វក្រពើភ្នំ ក្នុងតំបន់ទេសភាពខ្ពង់រាបភាគខាងកើត នៃប្រទេសកម្ពុជា៕