រដ្ឋមន្រ្តី៖ មុនឆ្នាំ២០២០ ត្រូវភ្ជាប់ប្រភពអគ្គិសនីពីបណ្តាញជាតិ ទៅតំបន់ទាំងអស់ដែលនៅសេសសល់
- 2019-01-23 07:53:05
- ចំនួនមតិ 0 | ចំនួនចែករំលែក 0
រដ្ឋមន្រ្តី៖ មុនឆ្នាំ២០២០ ត្រូវភ្ជាប់ប្រភពអគ្គិសនីពីបណ្តាញជាតិ ទៅតំបន់ទាំងអស់ដែលនៅសេសសល់
ចន្លោះមិនឃើញ
លោក ស៊ុយ សែម រដ្ឋមន្រ្តីក្រសួងរ៉ែ និងថាមពល បានណែនាំឱ្យអគ្គិសនីកម្ពុជា អាជ្ញាធរអគ្គិសនីកម្ពុជា និងអ្នកចែកចាយអគ្គិសនីទាំងអស់ នៅទូទាំងប្រទេស ត្រូវសហការគ្នាធ្វើយ៉ាងណា ភ្ជាប់ប្រភពអគ្គិសនីពីបណ្តាញជាតិ ទៅតំបន់ភូមិ-ឃុំ ដែលនៅសេសសល់ឲ្យប្រជាពលរដ្ឋ បានប្រើប្រាស់ឆាប់រហ័សមុនឆ្នាំ២០២០។ ការថ្លែងនេះ ធ្វើឡើងក្នុងឱកាសបើកសន្និបាត បូកសរុបការងារបញ្ចប់ឆ្នាំ២០១៨ របស់អាជ្ញាធរអគ្គិសនីកម្ពុជា នៅថ្ងៃទី២៣ ខែមករា ឆ្នាំ២០១៩។
លោកបានថ្លែងបញ្ជាក់យ៉ាងដូច្នេះថា៖ «បើធ្វើដូច្នេះបាន (តភ្ជាប់អគ្គិសនី) នៅចុងឆ្នាំ២០២០ យ៉ាងហោចណាស់ភូមិ ចំនួន ១៤ ០៧២ ភូមិស្មើនឹង៩៩,៣២% នៃភូមិទូទាំងប្រទេស នឹងទទួលបានការផ្គត់ផ្គង់អគ្គិសនីពីប្រភពបណ្តាញជាតិ»។
លោករដ្ឋមន្រ្តីបន្តថា ចំពោះភូមិមានលក្ខណៈលំបាកខាងភូមិសាស្រ្ត និងមិនទាន់មានអ្នកទទួលវិនិយោគ ចំនួន០,៦៨% អគ្គិសនីកម្ពុជា អាជ្ញាធរអគ្គិសនីកម្ពុជា និងអ្នកចែកចាយអគ្គិសនីទាំងអស់ត្រូវរួមគ្នាធ្វើយ៉ាងណាសិក្សា និងរកវិធីសាស្រ្ត ដើម្បីធ្វើឲ្យភូមិទាំងនោះ មានអគ្គិសនីប្រើប្រាស់ ទោះជាត្រូវដោះស្រាយ តាមរបៀបប្រព័ន្ធទោល ឬក៏ត្រូវប្រើប្រាស់ ការឧបត្ថម្ភធនប្រភេទណាក៏ដោយ។
«គោលបំណងរបស់ខ្ញុំ ខ្ញុំចង់ឲ្យការតភ្ជាប់ចរន្ត ឲ្យលំនៅឋានប្រជាពលរដ្ឋ កើនដល់៩០% នៅចុងអាណត្តិទី៦ខាងមុខ ដូច្នេះយើងត្រូវគិតគូរ អំពីការអនុគ្រោះថ្លៃ ភ្ជាប់ចរន្តនិងប្រាក់កក់ លើថ្លៃប្រើប្រាស់អគ្គិសនី សម្រាប់លំនៅឋានក្រីក្របន្ថែមទៀត»។ នេះជាលើកឡើងបន្ថែមរបស់លោក ស៊ុយ សែម។
សូមជម្រាបថា ចំពោះបញ្ហាថ្លៃអគ្គិសនី រាជរដ្ឋាភិបាលបានបន្ថយថ្លៃ សម្រាប់លំនៅឋានក្រីក្រ ដោយប្រើតិចជាង ១០គីឡូវ៉ាត់ម៉ោងក្នុង១ខែ មកត្រឹម៣៨០រៀល ក្នុង១គីឡូវ៉ាត់ម៉ោង និងលំនៅឋានប្រើពី ១១ដល់ ៥០គីឡូវ៉ាត់ម៉ោងក្នុង១ខែ មកត្រឹម៤៨០រៀល៕