ស្នងការ​នគរបាល​ខេត្តប៉ៃលិន ត្រូវបាន​ផ្លាស់ប្តូរជាផ្លូវការ​ហើយ នៅព្រឹក​ថ្ងៃទី៣១ ខែ​មករា ឆ្នាំ​២០១៩ នេះ។ ពិធីផ្លាស់ប្តូរ​នេះ ធ្វើឡើង​ក្រោម​អធិបតីភាព​នាយ​ឧត្តមសេនីយ៍​ នេត សាវឿន អគ្គ​ស្នងការ​នគរបាល​ជាតិ។

លោក​ឧត្តមសេនីយ៍​ទោ សេង សុគន្ធ ស្នងការ​រង​នគរបាល​រាជធានី​ភ្នំពេញ ត្រូវបាន​ប្រកាស​តែងតាំង​ជាស្នងការ​នគរបាល​ខេត្ត​ប៉ៃលិន ជំនួស​លោក​ឧត្តមសេនីយ៍​ទោ ជា ចាន់ឌិន ដែលត្រូវ​ចូល​និវត្តន៍។

គួរបញ្ជាក់​ថា នាយ​នគរបាល​ថ្នាក់​ឧត្តមសេនីយ៍ ក្របខណ្ឌ​មន្ត្រី​នគរបាលជាតិ​កម្ពុជា នៃ​ក្រសួង​មហាផ្ទៃ​ចំនួន២២​រូប ត្រូវបាន​ដាក់​ឲ្យចូល​និវត្តន៍ ដោយ​ក្នុងនោះ​ មាន​ស្នងការ​នគរបាល​ខេត្ត​ចំនួន០៣រូប​ដែរ គឺ​ស្នងការ​នគរបាលខេត្ត​ប៉ៃលិន ខេត្ត​ព្រៃវែង និងខេត្ត​កំពង់ឆ្នាំង។ នេះបើ​យោងតាម​ព្រះរាជក្រឹត្យ ចុះថ្ងៃទី​២៩ ខែ​កញ្ញា ឆ្នាំ​២០១៨។

យោង​តាម​ព្រះរាជក្រឹត្យ​បាន​ឲ្យដឹង​ថា ស្នងការ​នគរបាល​ទាំង​៣រូប ដែលត្រូវ​ដាក់ឲ្យចូល​និវត្តន៍ មាន​ដូចជា៖ ១. លោក​ឧត្តមសេនីយ៍​ទោ ស្រេង ជា ស្នងការ​នគរបាល​ខេត្ត​ព្រៃវែង។ ទី២. លោក​ឧត្តមសេនីយ៍​ទោ ជា ចាន់ឌិន ស្នងការ​នគរបាល​ខេត្ត​ប៉ៃលិន និង​ទី៣. លោក​ឧត្តមសេនីយ៍ ឡុច វណ្ណារ៉ា ស្នងការ​នគរបាលខេត្ត​កំពង់ឆ្នាំង៕