កម្ពុជា-ចិន ចុះកិច្ចព្រមព្រៀងលើគម្រោងនៃមូលនិធិមេគង្គ-ឡានឆាង តម្លៃជាង ៧លានដុល្លារ

2019-02-14 04:38:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងលោក វ៉ាង វិនធាន (Wang Wen tain) ឯកអគ្គរដ្ឋទូតចិនប្រចាំកម្ពុជា បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើគម្រោងនៃមូលនិធិពិសេសមេគង្គ-ឡានឆាង នាព្រឹកថ្ងៃទី១៤ ខែកុម្ភៈ ឆ្នាំ២០១៩ នៅទីស្តីការក្រសួងការបរទេស។

ការចុះកិច្ចព្រមព្រៀងនេះ ធ្វើឡើងបន្ទាប់ពីគម្រោងកម្ពុជាចំនួន១៩ ត្រូវបានអនុម័តនៅក្នុងកិច្ចប្រជុំរដ្ឋមន្រ្តីការបរទេសមេគង្គ-ឡានឆាងលើកទី៤ នៅប្រទេសឡាវ កាលពីខែធ្នូ ឆ្នាំ២០១៨ ដែលមានទឹកប្រាក់សរុបចំនួន ៧,៦៦លានដុល្លារ។

គម្រោងកម្ពុជាទាំង១៩ មានដូចជាៈ

១. កម្មវិធីគាំទ្រអាហារូបករណ៍សម្រាប់ឱកាសសិស្សក្រីក្រសិក្សាលើវិស័យវិស្វកម្ម ទូរគមនាគមន៍នៅប្រទេសចិន។

២. វគ្គបណ្តុះបណ្តាល ស្តីពីការគ្រប់គ្រងគម្រោង និងការអភិវឌ្ឍតាមវិស័យអទិភាពសំខាន់ៗ នៃកិច្ចសហប្រតិបត្តិការមេគង្គ-ឡានឆាង។

៣. ការកាត់បន្ថយភាពក្រីក្រតាមរយៈការអភិវឌ្ឍ សេដ្ឋកិច្ចជនបទនៅកម្ពុជា(ដំណាក់កាលទី២)។

៤. ការអភិវឌ្ឍសមាហរណកម្មសហគមន៍តាមដងទន្លេមេគង្គ (ដំណាក់កាលទី២)។

ទន្លេមេគង្គនៅក្រុងកំពង់ចាម

៥. កិច្ចសន្ទនាអន្តរជំនឿស្តីពីសន្តិភាព និងការអភិវឌ្ឍជានិរន្តន៍ ក្នុងបណ្តាប្រទេសតាមដងទន្លេមេគង្គ។

៦. សន្និសីទមេគង្គ-ឡានឆាងស្តីពីការបកស្រាយបេតិកភណ្ឌធម្មជាតិ និងវប្បធម៌ ឆ្ពោះទៅរក មគ្គុទេសក៏ប្រកបដោយគុណភាព និងទេសចរពេញចិត្ត (ដំណាក់កាលទី១)។

៧. ការបង្ការគ្រោះថ្នាក់យន្តហោះតាមរយៈការពង្រឹងកិច្ចសហប្រតិបត្តិការនៃបណ្តាប្រទេសមេគង្គ-ឡានឆាង (កម្ពុជា ចិន ឡាវ មីយ៉ាន់ម៉ា ថៃឡង់ដ៏ និងវៀតណាម)។

៨. ការកសាងសមត្ថភាពលើការអនុវត្តក្របខណ្ឌគុណវុឌ្ឍជាតិ និងការធានាគុណភាពអប់រំឧត្តមសិក្សានៅក្នុងប្រទេសកម្ពុជា ឡាវ មីយ៉ាន់ម៉ា និងវៀតណាម។

៩. ពង្រឹងសមត្ថភាពសម្រាប់ការអនុវត្តផែនការយុទ្ធសាស្រ្តគ្រប់គ្រងតំបន់ការពារធម្មជាតិ និងក្របខ័ណ្ឌរេដបូក ក្នុងបណ្តាប្រទេសមហាអនុតំបន់មេគង្គ-ទ្បានឆាង។

១០. គម្រោងកសាងសមត្ថភាព តាមរយៈកិច្ចសហប្រតិបត្តិការមេគង្គ-ឡានឆាង សម្រាប់សេដ្ឋកិច្ចឌីជីថល។

១១. វេទិកាសន្តិសុខបច្ចេកវិទ្យាគមនាគមន៍ និងព័ត៌មាន និងលំហាត់សមយុទ្ធមេគង្គ-ឡានឆាង។

១២. ការគ្រប់គ្រងធនធានទឹក និងធនធានពាក់ព័ន្ធឆ្លងដែនដោយផ្អែកលើសហគមន៍នៅតំបន់ព្រំដែនកម្ពុជា-វៀតណាម និងផ្សព្វផ្សាយបទពិសោធន៍ទទួលបានទៅតំបន់ព្រំដែនកម្ពុជា-ឡាវ។

១៣. គម្រោងបណ្ដាញកិច្ចសហប្រតិបត្តិការក្របខណ្ឌវប្បធម៌មេគង្គ-ឡានឆាង។

១៤. ផលប៉ះពាល់នៃព័ត៌មានក្លែងក្លាយ និងដំណោះស្រាយរបស់រដ្ឋាភិបាល។

១៥. ការអភិវឌ្ឍសមត្ថភាពដើម្បីចូលរួមចំណែកក្នុងការគ្រប់គ្រងព្រៃឈើប្រកបដោយនិរន្តរភាពនៅក្នុងតំបន់មេគង្គ-ឡាងឆាង។

១៦. សហគ្រប់គ្រងសមាគមនេសាទ ការកសាងសមត្ថភាព និងការចែករំលែកមេរៀន និងបទពិសោធន៍អំពីសហគមន៍នេសាទជាមួយបណ្តាប្រទេសក្នុងតំបន់មេគង្គ។

១៧. ការបណ្តុះបណ្តាលគ្រូបង្គោល និងអ្នកដឹកនាំសវនករផ្នែកប្រព័ន្ធគ្រប់គ្រងគុណភាព ISO9001:2015។

១៨. ការគ្រប់គ្រងទឹករបៀបការទូត នៃអាងទន្លេមេគង្គ ឆ្ពោះទៅរកការប្រើប្រាស់អាងទន្លេរួម ដើម្បីភាពរុងរឿង។

និងទី១៩. ការកសាងភាពជាដៃគូក្នុងតំបន់សម្រាប់នវានុវត្តន៍វិស័យអប់រំថ្នាក់ឧត្តមសិក្សា។

លោក ប្រាក់ សុខុន បានបញ្ជាក់ថា ពិធីចុះហត្ថលេខានាថ្ងៃនេះ គឺជាតឹកតាងយ៉ាងច្បាស់លាស់ថា កិច្ចសហប្រតិបត្តិការមេគង្គ-ឡានឆាង បាននឹងកំពុងបោះជំហានទៅមុខយ៉ាងមាំមួន ជាមួយនឹងចំណងនៃកិច្ចសហប្រតិបត្តិការដ៏រឹងមាំតាមរយៈគម្រោងទាំងនេះ។ ថ្វីត្បិតតែគម្រោងទាំងនេះ មិនមែនជាគម្រោងហេដ្ឋារចនាសម្ព័ន្ធខ្នាតធំ ប៉ុន្តែវាបានផ្តល់នូវអត្ថប្រយោជន៍យ៉ាងច្រើនសម្រាប់អនុតំបន់មេគង្គ។

លោកបន្តថា ចាប់តាំងពីការបង្កើតកិច្ចសហប្រតិបត្តិការមេគង្គ-ឡានឆាង ប្រទេសកម្ពុជាបានទទួលគម្រោងសរុបចំនួន៣៥ ដែលមានវិសាលភាពគ្របដណ្តប់លើសកម្មភាពកិច្ចសហប្រតិបត្តិការក្នុងវិស័យកសិកម្ម ទេសចរណ៍ បច្ចេកទេសព័ត៌មានវិទ្យា អប់រំនិងស្រាវជ្រាវ ធនធានទឹក អភិវឌ្ឍន៍ជនបទ ការតភ្ជាប់ផ្លូវអាកាស ការផ្លាស់ប្តូរផ្នែកវប្បធម៌ និងសាសនា។ គម្រោងមួយចំនួនត្រូវបានបញ្ចប់ជាស្ថាពរ និងគម្រោងដែលនៅសល់ផ្សេងទៀត ជិតត្រូវបានបញ្ចប់ ឬមានវឌ្ឍនភាពគួរឲ្យសម្គាល់៕