ឡៅ ចិត្រា សង្ឃឹមឈ្នះ ៧៥% ខណៈស៊ុបភើលែក សង្ឃឹមឈ្នះ ៩០%

2019-02-15 10:31:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនខ្មែរ ឡៅ ចិត្រា និងកីឡាករថៃ ស៊ុបភើលែក ខេតមូកៅ សុទ្ធតែបង្ហាញក្ដីសង្ឃឹមរៀងខ្លួន នៅមុនប៉ះគ្នាក្នុងកម្មវិធី ONE: CLASH OF LEGENDS របស់ស្ថាប័ន ONE Championship នៅទីក្រុងបាងកក ប្រទេសថៃ នាថ្ងៃទី១៦ ខែកុម្ភៈ ឆ្នាំ២០១៩ ស្អែកនេះ។

ស៊ុបភើលែក (ឆ្វេង) និងឡៅ ចិត្រា

នៅពេលក្រុមអ្នកសារព័ត៌មានសួរពីក្ដីរំពឹងសម្រាប់ការប្រកួតដ៏ធំនេះ ទាំងចិត្រា និងស៊ុបភើលែក សុទ្ធតែមិនហ៊ានសង្ឃឹមដល់ ១០០% ពោលគឺចិត្រា ឆ្លើយថា សង្ឃឹមឈ្នះស៊ុបភើលែក ៧៥ភាគរយ ខណៈ ស៊ុបភើលែក ឆ្លើយថាសង្ឃឹមឈ្នះ ចិត្រា ៩០%។

ការមិនហ៊ានសង្ឃឹមដល់ ១០០% នេះ គឺដោយសារកីឡាករទាំង២ សុទ្ធតែបានដឹងពីភាពខ្លាំងរៀងៗខ្លួន។ ចិត្រា បញ្ជាក់ថា ស៊ុបភើលែក ជាកីឡាករដែលពូកែជើងស្ដាំ កែងស្ដាំ និងដៃស្ដាំ។ ចំណែកស៊ុបភើលែក បានបញ្ជាក់ដែរថា តាមរយៈវីដេអូប្រកួតរបស់ចិត្រា គឺអាចដឹងបានថា ចិត្រា មានចំណុចខ្លាំងច្រើន ជាពិសេសគឺជើងឆ្វេង និងកែងឆ្វេង។

ចំពោះបញ្ហារបួសដែលកើតឡើងកាលពីថ្មីៗកន្លងទៅនោះ ឡៅ ចិត្រា បានអះអាងថាជាសះស្បើយអស់ហើយ មិនមានបញ្ហានោះទេ។ ចំណែកការហ្វឹកហាត់ក៏បានល្អដែរ។

ការប្រកួតនឹងចាប់ផ្ដើមពីម៉ោង ៧យប់តទៅ ដោយចិត្រា និងស៊ុបភើលែក ជាគូទី៥។ ការប្រកួតនេះ មានផ្សាយបន្តផ្ទាល់តាមរយៈទំព័រហ្វេសប៊ុក YouTube និង App របស់ ONE Championship៕