វេណេហ្ស៊ុយអេឡា ឈានដល់ការបិទព្រំដែនជាបន្តបន្ទាប់

2019-02-22 04:17:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីវេណេហ្ស៊ុយអេឡា លោក នីកូឡាស ម៉ាឌូរ៉ូ បានប្រកាសបិទព្រំដែនជាមួយប្រទេសប្រេស៊ីល នៅយប់ថ្ងៃទី២១ ខែកុម្ភៈ ឆ្នាំ២០១៩ ដើម្បីបិទមិនឱ្យហូរចូលនូវជំនួយមនុស្សធម៌របស់អាមេរិក។

លោកបន្ថែមថា លោកក៏កំពុងពិចារណាបិទព្រំដែនជាមួយប្រទេសកូឡុំប៊ីផងដែរ បន្ទាប់ពីលោកបានបញ្ជាឱ្យយោធា ដាក់រនាំងបិទនៅចំណុចស្ពានព្រំដែនដ៏សំខាន់មួយរួចមកហើយ កាលពីពេលថ្មីៗនេះ។

ប្រធានាធិបតីរូបនេះ បានហៅការផ្តល់ជំនួយមនុស្សធម៌របស់អាមេរិក មកឱ្យប្រទេសវេណេហ្ស៊ុយអេឡា ថាជាការ «បង្កហេតុ» និងជា «ល្បែងកូនក្មេង» ហើយបានចោទថា ជាលេសសម្រាប់ការធ្វើអន្តរាគមន៍យោធាអាមេរិក ក្នុងប្រទេសលោក។

នៅក្នុងសប្តាហ៍នេះ រដ្ឋាភិបាលវេណេហ្ស៊ុយអេឡា បានបិទព្រំដែនសមុទ្រ និងអាកាស ជាមួយប្រទេស៣ នៅក្នុងតំបន់ការ៉ាប៊ីនរួចមកហើយ គឺ Aruba, Bonaire និង Curacao ដើម្បីទប់ស្កាត់ការបញ្ជូនជំនួយមនុស្សធម៌របស់អាមេរិក ដែលធ្វើឡើងតាមរយៈប្រទេសទាំងនេះ៕

ប្រភព៖ Aljazeera ប្រែសម្រួល៖ សំភី