ក្រសួងមហាផ្ទៃ ស្នើឲ្យគណបក្សអំណាចខ្មែរ ប្តូរឈ្មោះ

2019-02-27 03:14:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្នើឲ្យគណបក្សអំណាចខ្មែរ ធ្វើការពិនិត្យ និងសម្រេចប្តូរឈ្មោះ "គណបក្សអំណាចខ្មែរ" នេះឡើងវិញ។ នេះបើយោងតាមលិខិតចុះថ្ងៃទី២៦ ខែកុម្ភៈ ឆ្នាំ២០១៩ ជម្រាបជូនលោក សួង សុភ័ណ្ឌ ប្រធានគណបក្សអំណាចខ្មែរ។

ក្នុងលិខិតនេះ បានឱ្យដឹងថា ក្រសួងមហាផ្ទៃបានទទួលនូវលិខិតរបស់អតីតសមាជិកស្ថាបនិក និងអតីតថ្នាក់ដឹកនាំអំណាចខ្មែរ ដែលបានសំណូមពរឲ្យក្រសួងមហាផ្ទៃ ធ្វើការហាមឃាត់បុគ្គល ឬក្រុមផ្សេងៗទៀត ដែលមិនមែនជាស្ថាបនិកគណបក្សអំណាចខ្មែរ បន្តប្រើប្រាស់ឈ្មោះគណបក្ស ដោយផ្អែកតាមច្បាប់ស្តីពីគណបក្សនយោបាយ និងលក្ខន្តិកៈរបស់គណបក្សអំណាចខ្មែរ ដែលបានតម្កល់ទុកនៅក្រសួងមហាផ្ទៃនាពេលកន្លងមក។ ពាក់ព័ន្ធនឹងករណីនេះ ក្រសួងមហាផ្ទៃ បានស្នើឲ្យគណបក្សអំណាចខ្មែរ ធ្វើការពិនិត្យ និងសម្រេចប្តូរឈ្មោះ "គណបក្សអំណាចខ្មែរ" នេះឡើងវិញ។

លោក សួង សុភ័ណ្ឌ ប្រធានគណបក្សអំណាចខ្មែរ បានថ្លែងប្រាប់កាលពីរសៀលថ្ងៃទី២៦ ខែកុម្ភៈ ឆ្នាំ២០១៩ថា នៅថ្ងៃទី០៥ ខែមីនាខាងមុខនេះ គណៈកម្មាធិការអចិន្ត្រៃយ៍គណបក្ស និងសម្រេចយកឈ្មោះជាស្ថាពរ បន្ទាប់មកធ្វើការសមាជនៅថ្ងៃទី០៧ ខែមីនា ឆ្នាំ២០១៩។

លោកបន្តថា ឈ្មោះជាបឋមដែលត្រូវប្តូរពីគណបក្សអំណាចខ្មែរ គឺមានបី ទី១. គណបក្សខ្មែរឈ្នះ ២. គណបក្សជោគវាសនាជាតិខ្មែរ និងទី៣. គណបក្សខ្មែរដើម្បីខ្មែរ។

ចំណែកលោក សួន សេរីរដ្ឋា អតីតប្រធានគណបក្សអំណាចខ្មែរ បានឲ្យដឹងថា ចាប់ពីថ្ងៃនេះតទៅ គ្មានឈ្មោះគណបក្សអំណាចខ្មែរ ក្នុងបញ្ជីឈ្មោះគណបក្សនយោបាយរបស់ក្រសួងមហាផ្ទៃទៀតទេ។

ស្ថាបនិក និងថ្នាក់ដឹកនាំអចិន្ត្រៃយ៍ នៃគណបក្សអំណាចខ្មែរ ដែលដឹកនាំដោយលោក សួន សេរីរដ្ឋា បានសម្រេចដាក់ឈ្មោះថ្មីថា «គណបក្សកែទម្រង់ខ្មែរ Khmer Reform Party» ដែលនឹងត្រូវដាក់ជូនក្រសួងមហាផ្ទៃពិនិត្យសម្រេចក្នុងខែមីនា ឆ្នាំ២០១៩នេះ។

លោកបានបញ្ជាក់ថា៖ «ជនណាបុគ្គលណា ក្រៅពីសមាជិកស្ថាបនិក បើហ៊ានប្រើឈ្មោះ គណបក្សអំណាចខ្មែរ យកមកបោកប្រាស់មហាជន និងសាធារណទៀត នោះយើងជាសមាជិកស្ថាបនិក នឹងចាត់វិធានការតាមផ្លូវច្បាប់»៕