ប៉ូលិសរកឃើញទីតាំងក្លឹបកម្សាន្ត និងបារបារាំង ជាងមួយពាន់កន្លែងពាក់ព័ន្ធការប្រើប្រាស់ថ្នាំញៀន

2019-03-01 02:05:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សមត្ថកិច្ចបានរកឃើញថា ទីតាំងពាក់ព័ន្ធករណីប្រើប្រាស់ថ្នាំញៀនមានចំនួន ១២៩៥កន្លែង ដែលជាបណ្តាក្លឹបកម្សាន្ត និងបារបារាំង។ ក្នុងចំណោមទីតាំងដែលប្រើប្រាស់នោះ គឺមានជាងមួយពាន់កន្លែងហើយ បានធ្វើកិច្ចសន្យាបញ្ឈប់ការប្រើប្រាស់គ្រឿងញៀន។ នេះបើតាមរបាយការណ៍ដែលបានលើកឡើងក្នុងសន្និបាតបូកសរុបសភាពការណ៍ កិច្ចប្រតិបត្តការ រក្សាសន្តិសុខ សណ្តាប់ធ្នាប់សង្គមរាជធានីភ្នំពេញឆ្នាំ២០១៨ និងផ្សព្វផ្សាយទិសដៅការងារឆ្នាំ២០១៩ របស់ស្នងការដ្ឋាននគរបាលរាជធានីភ្នំពេញ កាលពីថ្ងៃទី២៨ ខែកុម្ភៈ ឆ្នាំ២០១៩។

នេះគឺជាលើកទី១ហើយ ដែលសេចក្តីរាយការណ៍បង្ហាញការរកឃើញ ទីតាំងពាក់ព័ន្ធនឹងករណីប្រើប្រាស់គ្រឿងញៀនដ៏ច្រើនសន្ធឹកសន្ធាប់ បានបញ្ចេញក្នុងសន្និបាតរបស់ស្នងការដ្ឋាននគរបាលរាជធានីភ្នំពេញ។

ការលើកឡើងបង្ហាញទីតាំងពាក់ព័ន្ធនឹងការប្រើប្រាស់គ្រឿងញៀនដ៏ច្រើននេះ គឺដោយសារសន្និបាត បានតម្រូវឲ្យមន្ត្រីនគរបាល និងនាយការិយាល័យជំនាញនីមួយៗឡើងរាយការណ៍អំពីបទល្មើស និងការបង្ក្រាបបទល្មើសក្នុងមូលដ្ឋានរបស់ខ្លួន។

សេចក្តីរាយការណ៍របស់មន្ត្រីនគរបាលមូលដ្ឋាន បានបង្ហាញទៀតដែរថា កន្លែងពាក់ព័ន្ធនឹងការប្រើប្រាស់ និងចែកចាយគ្រឿងញៀនដទៃទៀត ត្រូវគេរកឃើញនៅតាមសំណង់មិនរៀបរយ។

សេចក្តីរាយការណ៍នគរបាល នៅតាមប៉ុសិ៍្តរដ្ឋបាល បានរកឃើញ និងកត់សម្គាល់ថា មាន៥គោលដៅដទៃទៀតដូចជា តំបន់បឹងឈូក និងគោលដៅផ្សេងៗទៀតក្នុងខណ្ឌទាំង១២ ដូចជានៅតំបន់បឹងកក់ សង្កាត់ស្រះចក ក្នុងខណ្ឌដូនពេញ ដែលការចែកចាយ ហាក់ដូចជា មិនមានការលក់ដូរធំដុំនោះទេ។ ប៉ុន្តែវាជាករណីចែកចាយយ៉ាងសកម្ម ហើយក្នុងការលក់ជួញដូរនេះ គឺភាគច្រើនគេប្រើប្រាស់លើកុមារតូចៗ ក្មេងតូចៗ ដែលមិនគ្រប់អាយុត្រឹម១២ឬ១៣ឆ្នាំប៉ុណ្ណោះ ឬអាចជនពិការផងដែរ៕

អត្ថបទ៖ សោភា