សម្តេច ហ៊ុន សែន អះអាងថា ចិន មិនចង់ត្រួតត្រាខ្មែរនោះទេ

2019-03-01 03:05:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសថា កម្ពុជាមិនអនុញ្ញាតឱ្យចិនត្រួតត្រានោះទេ ហើយសម្តេចអះអាងថា ចិនក៏មិនចង់ត្រួតត្រាកម្ពុជាវិញនោះដែរ ដោយចិនគ្រាន់តែចង់ធ្វើជាមិត្តរបស់កម្ពុជា និងប្រទេសដទៃទៀតតែប៉ុណ្ណោះ។ ការថ្លែងដូច្នេះ ធ្វើឡើងក្នុងពិធីបើកការដ្ឋានសាងសង់មន្ទីរពេទ្យមិត្តភាពកម្ពុជា-ចិន ត្បូងឃ្មុំ តម្លៃជិត ៥០លានដុល្លារ នាព្រឹកថ្ងៃទី១ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេច ហ៊ុន សែន បន្ថែមថា កម្ពុជានៅតែបន្តប្រកាន់ខ្ជាប់គោលនយោបាយចិនមួយ ពោលគឺចាត់ទុកតៃវ៉ាន់គ្រាន់តែជាខេត្តមួយរបស់ចិន។ ជាមួយគ្នានេះ កម្ពុជា មិនអនុញ្ញាតឱ្យមានស្ថានទូត ឬស្ថានតំណាងតៃវ៉ាន់នៅក្នុងប្រទេសកម្ពុជានោះទេ ប៉ុន្តែសម្តេចបានស្វាគមន៍ចំពោះអ្នកវិនិយោគមកពីតៃវ៉ាន់។

ប្រមុខរាជរដ្ឋាភិបាលបញ្ជាក់ថា ការគោរពអធិបតេយ្យភាពរបស់ចិន មានតម្លៃស្មើនឹងការគោរពអធិបតេយ្យភាពរបស់កម្ពុជា។ «ប្រសិនបើមានប្រទេសណាមួយ មកបំបែកខេត្តណាមួយរបស់កម្ពុជា តើយើងខឹងទេ? យើងខឹង ចិនក៏ចេះខឹងដូចគ្នាដែរ ប្រសិនបើមានអ្នកណាចង់បំបែកតៃវ៉ាន់ ចេញពីចិន»។

សម្តេច ហ៊ុន សែន ក្នុងជំនួបជាមួយលោក លី ខឺឈាង នៅក្រុងប៉េកាំង កាលពីថ្ងៃទី២២ មករា ២០១៩ (រូបថត៖ ផ្តល់សិទ្ធិដោយ Reuters)

គួររំលឹកថា ក្នុងសេចក្តីថ្លែងការណ៍រួមរវាងកម្ពុជា និងចិន នៃដំណើរទស្សនកិច្ចរបស់សម្តេច ហ៊ុន សែន ទៅកាន់ប្រទេសចិន កាលពីខែមករា ឆ្នាំ២០១៩ បង្ហាញថា រាជរដ្ឋាភិបាលកម្ពុជា បានប្រកាសប្រឆាំងចំពោះការប្រកាសឯករាជ្យរបស់តៃវ៉ាន់គ្រប់ទម្រង់ ព្រមទាំងបន្តគាំទ្រការអភិវឌ្ឍដោយសន្តិភាពនូវទំនាក់ទំនងចិន និងតៃវ៉ាន់ និងបុព្វហេតុក្នុងការបង្រួបបង្រួមចិន។ «ភាគីកម្ពុជា សូមបញ្ជាក់សាជាថ្មីនូវការប្រកាន់ខ្ជាប់នូវគោលនយោបាយចិនមួយ ព្រមទាំងទទួលស្គាល់រដ្ឋាភិបាលសាធារណរដ្ឋប្រជាមានិតចិន ជារដ្ឋាភិបាលស្របច្បាប់តែមួយគត់ តំណាងឱ្យប្រទេសចិនទាំងមូល ហើយតៃវ៉ាន់ជាផ្នែកសំខាន់មួយ នៃបូរណភាពដែនដីរបស់ចិន»៕

អត្ថបទ៖ សំភី